Со измама победи во „Кој сака да биде милионер“, но беше осуден на затвор – Кој е Чарлс Инграм?

Сопругата и уште еден учесник му помогнале точно да одговори на сите 15 прашања во квизот „Кој сака да биде милионер?“. Откако неговата измама била откриена, морал да помине 18 месеци во затвор и да плати парична казна. Кој е Чарлс Инграм и како победи во квизот?

Своевремено квизот „Кој сака да биде милионер?“ го освои светот, а се емитуваше и кај нас во Македонија.

Приказната за поранешниот воен мајор Чарлс Инграм од Англија нè враќа во далечната 2001-ва година кога тој со помош на сопругата направи измама и за малку ќе добиеше милион британски фунти.

Чарлс Инграм бил поранешен воен мајор кој по струка е инженер со мастер диплома од областа на корпоративниот менаџмент.

За време на војната во Босна, тој бил распореден таму заедно со мировниот корпус, а поради скандалот на познатото квиз-шоу во 2003-та година морал да ја напушти Армијата, по 17 години работен стаж.

Во 2001-вата година публиката остана без зборови кога Чарлс Инграм одговори точно на 15-те прашања во квизот, што беше вистинска реткост, а веднаш предизвика сомнежи кај присутните во студиото.

По повторно прегледување на снимките било утврдено дека Инграм додека одговарал имал пријатели во студиото што му помагале да одговори точно на прашањата.

Неговата сопруга Дијана и Теквен Виток, кој исто така се натпреварувал во квизот, му давале сигнали на мајорот за тоа кој е точниот одговор.

Виток, кој работел како лектор на колеџот во Кардиф, Англија кашлал гласно за да му укаже на Инграм дека го дава точниот одговор, а го дувал носот за погрешен одговор.

Се верува дека тој во најголем дел ги знаел самиот точните одговори, затоа што имал големо искуство со претходни учества во квизови, а како „пријател“ што помагал со одговорите се јавувала и сопругата на Чарлс, Дијана.

Освен ваквите знаци, според организаторите, Инграм се користел и со пејџер и мобилен телефон.

Во видео снимката било забележано дека Виток се искашлал рекордни 192 пати за време на шоуто, а тој тврдел дека целиот свој живот има проблеми со кашлицата.

За измамата направена во квизот затворски казни заработиле сите тројца: Дијана и Чарлс Инграм биле осудени на 18 месеци затворска казна и две години условно, а Виток добил 12-месечна затворска казна и 2 години условна казна.

Освен затворската казна, Чарлс требало да плати казна од 25.000 британски фунти, што подоцна биле намалени на само 5.000 фунти.

Откако добил отказ во Армијата, тој и неговата сопруга водат мирен живот и продаваат рачно изработен накит на тезга.

Б. С. Б. | Црнобело