Како да носите свилена марама, најпопуларниот летен моден детаљ?

Околу врат, како летна за коса или околу половина – најпопуларниот начин за ова лето.

Марамата е моден детаљ што никогаш не излегува од мода, но ова лето стана вистински фаворит.

Притоа, трендсетерките покажаа дека можеме да ја носиме не само со елегантни, туку и со полежерни аутфити.

Како да носите марама ова лето?

Околу врат

Наједноставниот, но и најефективниот начин да носите марама ова лето е околу вратот.

Најпрво завиткајте ја во ролна, па само заврзете ја. Јазолот може да биде напред, назад, но и од страна.

Марамата околу вратот изгледа одлично со кошула, но и со маичка со прерамки, а го освежува целиот аутфит.

Одлична е и за минималистички комбинации на кои сакате да ставите акцент.

На главата

Дефинитивно еден од најпопуларните начини за носење марама ова лето.

Треба само да ја ставите марамата на горниот дел од главата и да ја врзете одзади над или под косата.

Овој тренд е идеален и ако косата ви е малку мрсна, но сакате да ја носите пуштена.

Како лента за коса

Марамата може да ви послужи и како стилска лента за коса.

Завиткајте ја во ролна и ставете ја на главата, преку ушите и заврзете ја под косата.

Потоа само извадете два прамена.

Околу половината

Уште еден доста популарен тренд за ова лето.

Поголемите марами можете да ги носите заврзани околу половината.

На овој начин изгледа одлично со широки панталони од лен, но можете да ја врзете и врз сако.

Опавче или пунџа во марама

Косата собрана во опавче или пунџа ќе изгледа многу поубаво ако додадете и марама.

Прво соберете ја косата со стегач, па на крај само врзете ја марамата.

Ако сте повешти во правење фризури, може да пробате и да ја исплетете во плетенка.

Спирова С. | Црнобело