Прстени, тесни фармерки: Облека која треба да ја избегнувате на високи температури

Секоја година, едвај чекаме да дојде лето. Безгрижност, плажа, одмор, лесна облека, забава – листата е бесконечна. Меѓутоа, кога температурите ќе станат екстремно високи, а асфалтот е скоро цел „стопен“, некако тоа лето и не ни е баш најомилено.

А, без разлика што надвор воздухот трепери од топлина, можеме да направиме барем едно нешто – да одбереме соодветна облека поради која нема да патиме повеќе од потребното.

Во летните месеци кога температурите стануваат луди, дајте ѝ предност на функционалноста. Потрудете се да не ви е жешко само затоа што некој дел од облеката и модните додатоци добро ви стојат. Постојат опции во кои ќе се поштедите од топлотен удар, а истовремено ќе изгледате модерно, без жртвување на визуелниот впечаток.

 Ова се летните парчиња кои е најдобро да ги прескокнете ова лето:

1. Прстени

Кога надвор е топло, бижутеријата остава ужасна зелена боја од оксидацијата на накитот. Токму затоа, најдобро е да не носите прстени во текот на летниот период. Нив може да ги замените со обетки или децентен ѓердан.

2. Тесни фармерки

Ако досега излегувавте од домот во вашите тесни фармерки, а температурата надвор е +30 степени, тогаш знаете зошто не ви препорачуваме да ги носите. Тие ќе се залепат за вашите бутови и ќе направат да го проколнувате моментот кога сте одлучиле да ги облечете.

3. Гладијаторки

Сандалите со ремчиња не се најдобриот избор кога е премногу топло од истата причина како и прстените. Во текот на денот може да ви се случи да ви потече зглобот, а ремчињата може болно да ви се врежат во ногата.

4. Свила

Можеби ви се чини дека свилената маичка е одлична за летните месеци, но на листата за прозрачност таа е на дното. Потењето никогаш не било секси и никогаш нема да биде.

5. Црна или сива боја

Веќе сите знаат дека во лето не е препорачливо да се носат темни бои. Дури и ако вообичаено носите црна и сива облека, одморете од овие бои за да се заштитите од топлотен удар. Иако црната може да изгледа како очигледно лоша боја за жештините, сивата е уште полоша бидејќи на неа се познаваат дамките од пот.

6. Најлонски хулахопки

Колку и да сте незадоволни од изгледот на вашите нозе, летните месеци се ужасни за носење хулахопки. Во текот на целиот ден ќе се чувствувате како кожата да ви се залепила за пластична кеса, а никому не му е грижа како ви изгледаат нозете.

7. Чизми

Кога некој ќе каже: „Но, тоа не се обични чизми, тоа се летни чизми“ единствено што ни доаѓа да кажеме е: „Извини, но тоа не постои, тоа и понатаму се чизми, а ти умираш од жештина.“ Затоа, одберете некои едноставни и што е можно поотворени сандали и уживајте во животот без да се мачите на жештините.

С. С. | Црнобело