Модни грешки кои ги правиме сите додека не созрееме

Учиме од грешките. Понекогаш, за жал, треба да се повторат неколкупати, за да конечно ја научиме лекцијата. А модата не е исклучок од правилото. Никој од нас не е имун на правењето модни грешки.

Но, мудроста доаѓа со текот на годините, созревањето носи поинаква перцепција.

Ова се најчестите модни гревови за кои (речиси) сите сме виновни во нашата младост:

Купуваме облека која не соодветствува со нашиот број

И тоа најчесто бројче или две помало од она што го носиме. Затоа што се убедуваме дека држиме диета и дека ќе успееме да се пикнеме во тој фустан или тие панталони многу наскоро.

Тоа најчесто не се случува, па облеката останува недопрена во плакарот. Или пак некако успеваме да го натнеме на себе, а изгледаме по малку смешно.

Во плакарот имаме прекрасни парчиња облека, но „скиснуваме“ во истите фармерки и блуза

Го полниме плакарот со интересни и квалитетни парчиња облека, но секојдневно сме во еден ист пар фармерки и иста блуза или маичка.

Причината? Не сакаме да ризикуваме или пак сме мрзеливи за да размислуваме за малку поинакви комбинации. Доколку излеземе надвор од секојдневната комфорна зона, имаме чувство дека сите очи се вперени во нас.

Слепо ги следиме трендовите

Кога некое парче облека е во тренд, имаме неодолива желба да го купиме веднаш. Притоа не размислувајќи за: цената, квалитетот и фактот што парчето ќе биде во тренд само една сезона.

Речиси сите сме жртви на модните трендови и не можеме да си помогнеме, особено додека сме помлади.

Ги копираме комбинациите на славните

Само затоа што одреден фустан ѝ стои одлично на Џенифер Лопез или на Бијонсе, не значи дека истиот треба да го ископираме за следната свадба или голема забава.

Не се чувствуваме удобно во најголемиот дел од облеката што ја поседуваме

Ова е поради фактот што купуваме парчиња од сосема погрешни причини.

На крајот завршуваме со купишта облека и за секое парче имаме коментар: предолго е, прекусо е, прешироко ми е, претесно, ме стега, ме чеша кожата, прешарено, пренападно… па најчесто активно носиме само 10% од облеката којашто ја поседуваме.

Дали се пронајдовте во модните грешки?

(О)Милена | Црнобело