На семеен одмор со Ана од Битола во Анталија: „Морето е магија, Турците се љубезни, а ги посетивме турскиот Дизниленд и Аквариумот“

„Секој ден го почнувавме со турско кафе или чај со поглед на море. Во хотелот бевме со Ultra All-Inclusive, со што не мора да се грижите за пари, имате што сакате и кога сакате од храна, но и забава и активности. Покрај прекрасното сместување и уживањето на плажата, нашиот одмор го збогативме со неколку волшебни излети“ - Ана од Битола за CRNOBELO.com раскажува детално за прекрасниот семеен одмор во Анталија. 

Ана Петровска (33), Магистер по деловно право, вработена во нотарска канцеларија, љубител на музиката и уметноста, со сопругот Никола Петровски (40), сообраќаен инженер, истовремено љубител на фотографијата и видеото и нивната 8-годишна ќеркичка Лина Петровска, љубител на цртањето и боењето, а и на природата, живеат во Битола.

Оваа година летниот одмор го поминаа во Анталија, Турција, а своите импресии и искуство решија да ги споделат за CRNOBELO.com. 

Во продолжение прочитајте повеќе за искуството од одморот во Анталија што Ана го раскажува за CRNOBELO.com...

„Нашето патување започна со возбуда уште од аеродромот во Скопје, а беше организирано преку скопска туристичка агенција. 

Летот до Анталија траеше приближно 1 час и 45 минути со авиокомпанијата Sun Exspress, удобно брзо и безбедно, време кое помина брзо благодарение на убавите погледи низ прозорецот и радоста на Лина која со нетрпение го очекуваше одморот од соништата.

По слетувањето на аеродромот во Анталија, следуваше пасошка контрола и подигнување на багажот, што траеше околу 30-45 минути.

Потоа, се упативме кон автобусот што нè чекаше пред аеродромот – трансферот до хотелот Sultan of Dreams во местото Кизилот траеше приближно 1 час и 30 минути, со кратко застанување кај уште неколку хотели за да се симнат други патници.

И покрај малиот умор од патот, возењето беше пријатно – имавме можност да уживаме во погледот на медитеранската природа, планините и брегот.

Кога конечно пристигнавме во хотелот, бевме пречекани со љубезен персонал, освежителен пијалак и насмевки. Сместувањето беше брзо и ефикасно, во прекрасна соба со преубав поглед.

Веднаш нè освои раскошниот влез, паркот, зеленилото и љубезниот персонал. Хотелот е сместен директно на прекрасна песочна плажа, со приватен пристап и лежалки под палми.

А морето… вистинска магија! Водата беше топла, кристално чиста и мирна, идеална и за деца и за релаксација. Плажата чиста, песочна со ситни камчиња и имаше доволно простор за сите.

Секој ден уживавме во капење, сончање и шетање по брегот, а моментите на зајдисонцето покрај морето и тие волшебни фотографии се нешто што засекогаш ќе го паметиме и врамиме во нашето срце.

Sultan of Dreams навистина го оправда името, престојувавме 6 ноќи, седум дена во чисти и комфорни соби, базените огромни и забавни, особено за деца, а храната вкусна и разновидна – за сечиј вкус.

Најубаво беше тоа што секој ден можевме да го започнеме со турско кафе или турски чај со поглед на море, а да го завршиме со прошетка покрај плажа и прекрасно зајдисонце.

Хотелот нудеше candy party и вечерни шоу-програми, анимации за деца и моменти за вистински одмор.

Во хотелот бевме со Ultra All-Inclusive, а тоа значеше целосно уживање без грижи со 3 оброци на шведска маса, ужини, сладолед, палачинки, алкохолни и безалкохолни пијалаци цел ден, забава, шоу програми, базени и плажа.

Продолжува на следната страница...