Airbnb за првпат нуди ноќевање во куќата на Јулија - Романтично патување за Денот на вљубените

Airbnb неколкупати ги поместува границите и досега има понудено ноќевање во Лувр, во куќа изградена од чоколадо, во Барби вилата на Малибу…

Овојпат, сајтот подготви вистинско изненадување за вљубените парови – ноќевање во едно од најромантичните места на светот.

Годинава можете да го поминете Денот на вљубените во куќата на Јулија во Верона.

Ова место со години е тема на зборување и пишување, но е и симбол на вечната љубов. Поради тоа, изгледа како совршена локација за прослава на Денот на вљубените.

„Куќата на Јулија е најпознатиот музеј во Верона и секоја година привлекува милиони посетители. Соработката со Airbnb го оживува надалеку познатиот Шекспиров мит за Ромео и Јулија на претходно невиден начин“, изјави градоначалникот на Верона.

„Возбудени сме што ќе го промовираме нашето културно наследство, ќе ги делиме традициите кои сме ги чувале и ќе ја претставиме Верона на светот.“

Иако нема докази дека ова навистина бил домот на Јулија, оваа локација отсекогаш ги привлекувала вљубените.

Со оваа понуда не само што ќе ноќевате во внатрешноста на куќата која како да застанала во времето, туку ќе уживате и во романтична вечера приготвена од професионален готвач.

После интимната вечера ќе следи и мал курс по готвење одржан од готвачот.

Вечерта ќе продолжи со дружење покрај каминот и одговарање писма што секоја година пристигнуваат за Јулија.

Парот ќе има можност и да ја прошета Верона со водич и приватен фотограф.

Сепак, нема сите да имаат можност за ваква прослава.

Како да резервирате?

Секоја година над илјадници писма пристигнуваат во куќата на Јулија. Токму оваа традиција ја направи Верона град на љубовта.

Сите писма ги одговараат жени, кои се познати под името Juliet’s Club.

За да останат верни на традицијата, од Airbnb решиле да организираат натпревар. Ако сакате да го поминете Денот на вљубените во куќата на Јулија, треба да испратите писмо до Airbnb во кое ќе ја раскажете вашата љубовна приказна и ќе објасните зошто вие и партнерот сте совршените гости.

Најкреативните ќе добијат можност да преноќат овде.

Писмата треба да ги испратите најдоцна до 2-ри февруари, а за повеќе детали можете да погледнете овде.

Спирова С. | Црнобело