Напуштените места во Македонија низ објективот на истражувач од Франција (фото)

25-годишниот Сем од Франција има живеено во Велика Британија, Нов Зеланд и Малезија. Има патувано низ целата Азија, а моментално ги истражува Балканот и Источна Европа.

Како што вели, урбаното истражување му е голема страст, особено кога станува збор за напуштени места и објекти.

„Возбудливо е да се почувствува енергијата на местата кои во минатото биле полни со живот“, напиша Сем на својот веб-сајт.

Пред некое време тој го започнал проектот „WayOut53“ – проект за „невидливите сили кои нè тераат да почитуваме и да се однесуваме на начин на кој не би се однесувале сами“.

Преку неговите фотографии, тој се обидува да ги раскаже приказните на државите кои се соочиле со тоталитаризам и слични уредувања, со или без согласност на населението.

„Ова е проект кој се роди бидејќи и јас самиот го почувствував губењето на слободната волја, способноста да се согласам или да не се согласам со нешто“, пишува Сем.

Како дел од неговиот проект, Сем ја посетил и Македонија - бил во хотелот „Европа“ во Отешево, хотелите „Куба“ и „Кристал“ во Куманово, како и напуштената фабрика „Жито-мел“. Сем го посетил и Споменикот „Илинден“ во Крушево.

„Имав навистина интензивен викенд во Куманово, истражувајќи дел од бројните напуштени места во градот. Куманово имал добра туристичка економија придвижена од минералните извори.

Како што комунистичката економија почнала да се повлекува, управувањето на многу бизниси им останало на приватните инвеститори. Овие приватни инвеститори ја искористиле ситуацијата во нивна корист, што довело до банкротирање на многу бизниси во Куманово“, пишува Сем за Куманово.

Споменикот „Илинден“ во Крушево, иако не е напуштен, му оставил многу добар впечаток на Сем. Па, тој посветил цела статија само на него.

„Сакав да напишам текст само за овој споменик бидејќи уметниците што го дизајнирале одбрале да го искажат македонскиот идентитет и желбата за независност на многу интересен и фигуративен начин“, вели Сем за споменикот.

Кога сакал да го истражи хотелот „Европа“, Сем имал тешкотии при наоѓањето сместување.

Смета дека оваа ситуација одлично ја отсликува очајната потреба на Отешево за инвеститори кои ќе му го вратат животот на местото.

Ова е навистина интересен проект што сигурно ќе ве заинтересира за нашата историја и сите скриени богатства што ги имаме во државата.

За да дознаете нешто повеќе за авантурите на Сем, посетете го неговиот веб-сајт.

Спирова С. | Црнобело / фото: wayout53