Островот со најубави плажи

Грција привлекува голем број туристи – сонце, античка уметност, интересен начин на живот, преубави плажи, узо, традиција... Грчките острови се приказна сама за себе.

Тие се едни од најубавите предели во оваа земја. Грците и туристите се согласни за едно: Кефалонија е навистина еден од најубавите грчки острови. Од највисоките делови на островот имате поглед кон сите останати јонски острови.

Островот изобилува со преубави плажи, фасцинирачки езера, зелени долини, густа шума, разновидно цвеќе. Во малите раштркани села ќе наидете на љубезни селани и ќе се запознаете со нивниот традиционален начин на живот.

Кефалонија е навистина поразлична од останатите грчки острови, а сепак толку грчка. Овој остров ја има задржано својата автентичност и карактер. Ќе се забавувате со вино, песна и танцување. За младите постои и широк спектар на ноќни забави.

Најголемо богатство на островот се големиот број прекрасни плажи. Најубава плажа на островот е Миртос која важи за една од најубавите плажи во Европа. Снежно бел песок помешан со ситни каменчиња и тиркизното море ќе ве остават без здив. На северниот дел од островот се наоѓа езерото Мелисани со долга сончева плажа Антисамос окружена со бујна вегетација.

На полуостровот Ласи се сместени уште неколку златно жолти песочни плажи: Макрис Јалос, Платис Јалос, Градакиа и уште многу други каде може да уживате во сенка и бројни спортски активности.

Дел од Кефалонија е и Итака – малиот остров со голема историја. Итака уште и го носи името како домот на Одисеј.

Лицето на вистинската Грција во нејзините северните делови и не е баш како што било. Но, не и на Кефалонија. Овде освен во прекрасните плажи ќе можете да уживате и во вкусната храна на грчките таверни, гостопримливоста, грчките забави, природата... Желбата за повторно да се враќате на овој остров ќе ве следи уште долго време.