„Турата од 600 денари со брод од Охрид до Свети Наум ми е едно од најубавите искуства во Македонија - топло го препорачувам“

Манастирот Свети Наум, спој на природата, историјата и религијата

Крајната дестинација на ова еднодневно крстарење е манастирскиот комплекс Свети Наум каде извира реката Црни Дрим. Изворите се прав мал зелен рај со кристална вода, чиниш кајчињата лебдат на неа. А таа толку е ледена, што ни минута не издржав.

Бродот останува закотвен три часа, а тоа е доволно за да се посети стариот манастирски комплекс, да се пробаат охридските деликатеси во одличните ресторани со прекрасен поглед на изворите или пак за релаксација на плажата со ледена и чиста вода и ситни каменчиња.

Секако, има и многу тезги кои го нудат најубавото од Охрид, бисерот, па затоа не заборавајте да се почестите себеси или саканата со пар обетки или белегзија.

Манастирот посветен на светецот Наум Чудотворец е изграден на самата карпа која гордо се издигнува на езерото, а во него се моштите на големиот просветител. Манастирскиот комплекс во чиј склоп имам неколку помали цркви воодушевува не само со својата убавина, туку и духовната мир, историјата и божествената природа, како мало парче рај на земјата, вгнезден меѓу планината Галичица и Охридското езеро.

Овој манастир со корени уште од далечната 900-та година е заштитник на болните, посебно душевно болните, а според некои приказни што старите ги раскажуваат, на ова свето и убаво место, чуда се случувале. Многумина веруваат дека кога ќе го ставите увото на гробот на светецот ќе го слушнете биењето на неговото срце.

Ако сте љубител на историјата и културата во комбинација со прекрасните охридски пејзажи тогаш ова крстарење е вистинскиот избор за Вас. Јас за него дефинитивно ќе раскажувам на другарите од целиот свет. Во Македонија навистина има што да се види и почувствува.

Во тие неколку часа ќе го доживеете Охрид на поинаков начин, далеку од туристите, чаршискиот метеж и забавите на познатите плажи, ќе запознаете еден културно и историски богат Охрид со божествена убавина.

На ова кратко бродско патешествие ваши сопатници ќе бидат белите галеби кои љубопитно го следат бродот низ езерската шир која ја пресликува убавината на старите карпи од крајбрежјето.

©CRNOBELO.com Забрането преземање и копирање. Крадењето на авторски текстови  и фотографии е казниво со закон.

И. Ј.| Црнобело / фото: И. Ј.