Не е срамота да нарачате само кафе и да седите со часови - Грк споделува совети за културно однесување за туристите

Студените кафиња најчесто ќе ги најдете со ознаката „freddo“. Без разлика дали е еспресо, капучино или фрапе, ако го видите зборот „freddo“ тоа значи дека во него има мраз.

Во Грција се излегува по 22.30 часот. Не брзајте да влезете во баровите или во клубовите пред 22.00 часот, освен кога не сте сигурни дали ќе најдете маса за седење.

Ако одите во цркви и во манастири, облечете се соодветно. Во храмовите е некултурно да влегувате во бикини и во апостолки.

Немојте да крадете овошје од туѓите дворови што ќе ги сретнете по пат. Ако има некој во дворот, замолете го да ви даде од овошјето, сигурно ќе ви наполни да имате и за по пат, затоа што ќе го ценат тоа што прво сте ги прашале дали може да земете.

Од 14:30 до 17:30 Грците вообичаено имаат сиеста. Во тој период голем број од продавниците се затворени, а локалното население сака да одмори. Во тој период од денот потребно е да бидете потивки (доколку престојувате на место каде има голем број локално население) и одморете се.

Во Грција, сообраќајните правила, луѓето ги сфаќаат само како препораки, па особено е важно да бидете внимателни. Грците се озлогласени како мошне лоши возачи.

Исто така, треба да имате предвид дека на пешачки премин речиси никој не застанува, сѐ додека не застанете среде улица. Затоа потребно е да бидете мошне внимателни ако пешачите низ грчките градови.

Броевите на итните служби во Грција се - полиција: 100, брза помош 166, противпожарна служба 199.

На плажа не влегувајте во вода веднаш по оброк. Почекајте 1, 2 или 3 часа пред да влезете во вода и пливајте со празен стомак. Ако сте најадени ќе се изморите многу побрзо и постои опасност да се удавите.

Исто така, ако забележите дека ветерот дува во спротивен правец од плажата и кон отворено море, не се оддалечувајте премногу од брегот. Морските струи може брзо да ве повлечат.

Б. С. Б. | Црнобело