„Гужва насекаде, нема билети за траект“ - На што се жалат најмногу туристите во Хрватска?

„Движењето по скалите низ река од туристи е грозно, превозот е збунувачки, а насекаде има туристички замки и едно шише вода ќе ви наплатат 50 куни (6,66 евра)“ – вели еден разочаран турист што летово ја посетил Хрватска. Што им пречи најмногу на туристите таму?

Покрај Грција, Хрватска е една од омилените дестинации кај повеќето балкански туристи, а годинава некои од туристите што биле таму се пожалија на повеќе работи. На голем број туристички форуми и блогови изразија незадоволство од посетата на земјата, а на што најмногу се жалат.

Веб порталот punkofer.hr објави статија во која ги собра искуствата од повеќе туристи што биле незадоволни од посетата на Хрватска. Во моментов, туристите од Балканот најмногу се жалат на – другите туристи кои во минатото често оделе во Шпанија и Италија.

Туристите се задоволни од прекрасната природа и од морето, од архитектурата и ниската стапка на криминал, заради што можете без проблем да шетате и ноќе, но им пречат огромните гужви, огромното поскапување и неорганизираниот јавен превоз.

„Хрватска некогаш беше евтина, „неважна“ дестинација, затоа што сите трчаа во Шпанија и Италија. Сега насекаде врие од туристи. Билетите за траект предвреме се распродадени и не можете да ги купите однапред онлајн. Airbnb сместувањата се пополнети.

Насекаде има туристички замки, едно шише вода ќе ви наплатат 50 куни (6,66 евра). Не можеш да најдеш ниту Uber. Долгите редици водат до некоја благајна и насекаде – во рестораните, кај атракциите, врие од туристи, а движењето по скалите низ река од туристи е грозно.

Исто така не сфаќам зошто превозот е толку збунувачки, ако се има предвид дека Хрватска е туристички епицентар. Возниот ред на траектите е конфузен.

Постојат околу 4 различни оператори со различно работно време. Билетарниците тешко се наоѓаат затоа што ги нема на Google, а ако се обидете да ги купите онлајн ви пишува дека се недостапни без појаснување. Сепак, кога ќе стигнете на благајна, можете да купите билети без проблем.

Станиците на автобусот што вози од Стариот град до Хвар треба да ги прашате мештаните затоа што онлајн не можете да ги најдете.

И да, иронично е да се жалам на туристичко место како турист, но да знаев дека е така, никогаш не би дошол во Хрватска“ – раскажа еден маж на Reddit.

Инаку, изминатото лето Хрватска ја посетија повеќе познати личности, меѓу кои Викторија и Дејвид Бекам, Бионсе и Џеј Зи, Кајли Миног, Метју Меконахи.

Б. С. Б. | Црнобело

фото: depositphotos.com