Типови на луѓе на кои наидувам додека шетам со бебе низ Скопје

Да се шета со количка за бебе низ улиците на Скопје е вистински предизвик - од тротоари зафатени со паркирани автомобили, до „главни“ шофери што не застануваат на пешачки и „прошишуваат“ како на трки и мајки што „урлаат“ по децата и го будат твоето... Се согласувате ли?

Кога сте често надвор, лесно може да ја забележите сообраќајната, но и домашната култура на луѓето кои ги сретнувате.

Но, тука се и оние љубезните кои секогаш се подготвени да помогнат.

За време на прошетките со моето дете низ улиците на Скопје, сретнав неколку типови на луѓе:

- Детето што држи баскет во раце и почнува да тапка баш кога се разминуваме, додека бебето спие во количка.

- Но, и другарчето на детето што му кажува – не тапкај – бебе има, можеби спие.

- Возачот на јак автомобил што мисли дека улиците се негови ако има скапо возило, па не смета дека треба да пропушти пешаци, па уште и со бебе.

- А, и јаките шофери што еден по друг го „прошишуваат“ пешачкиот додека стојам со количка со бебе и уредно чекам некој да се сети да застане.

- Но, тука се и најталентираните паркирачи кои го зафаќаат цел тротоар и нема каде да се помине - независно дали е споредна улица или прометен булевар, како и оние кои ги блокираат патеките за преминување.

- Жени на поминување кои се расположени да делат секакви совети за детето кога плаче, од типот – леле ова плачење е за запчиња, ѝ растат, мачкај ја...

- Мајката на поголемо дете што одлучува да „урла“ среде улица или парк, додека стои над количка со бебе, кое секако се буди од спиење од нејзиниот вресок...

- Келнери што првпат ги гледам и мислат дека е во ред да ми го допираат детето по раце и да му се „напикаат“ во лице.

- Но, тука се и оние келнери, продавачи или случајни минувачи кои секогаш притрчуваат да помогнат за качување по скали со количката. 

- Продавачките и случајни минувачи што знаат дали му е топло или ладно на моето дете, па oдлучуваат да си кажат - ладно е, стави ѝ капа, јакничка, покриј ја... 

Се согласувате ли? Кои типови на луѓе ги сретнувате вие? 

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело

Фото: Приватна архива