Мислењата се поделени: Предебела или со идеални облини?

Откако гордо ги покажа своите раскошни облини на насловната страна од магазинот „Sports Illustrated“, почна и жестоката дебата на интернет: Дали е предебела или жена со совршени облини? 

Хантер Мекгрејди (23) е „плус сајз“ модел со американска адреса. Толку е самоуверена и задоволна од својот изглед, што е мотивација за многу жени кои изгледаат како неа, а се чувствуваат непријатно поради тоа што имаат некој килограм повеќе. Својата поддршка, пак, Хантер им ја дава и на социјалната мрежа Инстаграм.

За своите први обиди да зачекори во светот на модата вели:

„Се сеќавам, имав само 16 години, кога со мајка ми отидов на претходно договореното снимање за линија маици со куси ракави. Но, штом се појавив, веднаш ми рекоа да си одам дома бидејќи сум предебела за нив. Не ми дадоа шанса ниту да пробам некоја од маиците. Бев толку понижена, а во исто време тажна, вознемирена и збунета“ – раскажува Хантер.

Хантер одлучила дека повеќе нема да живее онака како другите очекуваат од нејзе.

„По тоа понижување, на мои 16 години, одлучив дека ќе го сакам своето тело, бидејќи тоа е мое и единственото кое го имам. Уште повеќе пораснав и колковите ми се заоблија. Ми се појавија и стрии, но се вљубив и во нив, бидејќи покажуваа дека од мало девојче израснав во вистинска жена. Имам и целулит, баш како и секоја друга жена во светот. Го прифатив сето ова бидејќи ми беше преубаво. Станав жена. Тоа за мене беше нешто гламурозно“- продолжува оваа самоуверена девојка.

На сите други жени им порачува да бидат горди на своето тело:

„Сите вие кои се чувствувате несигурно и непријатно ви е поради салото на стомакот, или поради стриите, или целулитот, или акните... Или можеби мислите дека не сте доволно убави бидејќи никогаш не сте биле на насловната страна – вие сте прекрасни! Вие сте јаки. Вие сте моќни. Заедно треба да се инспирираме и подигнуваме една со друга. Премногу нешта се случуваат во овој свет, за да едни со други се напуштиме кога паѓаме.“

Коментарите кои ги предизвикува се секакви, од оние дека дебелината не треба да се рекламира, па сè до тие дека Хантер е сензуална жена која изгледа преубаво.

Што мислите вие?

М. А. | Црнобело