Со мајонез и млеко: Како да ги негувате собните билки?

Собните растенија се совршен жив украс во ентериерот. Овојпат, ви откриваме неколку несекојдневни, но одлични совети како да ги одржувате здрави и со поубав изглед.

Сте знаеле ли дека мајонезот и чајот може да ги направат вашите домашни билки поздрави и поубави? Постојат бројни едноставни начини на кои со многу малку труд, а воопшто пари, можете да ги одгледувате вашите собни растенија како вистински експерти за хортикултура.

Најпрво, при одлучувањето каде да ја сместите билката, она што треба да имате на ум е дека низ прозорците кои се свртени кон југ допира многу повеќе светлина од оние кои се позиционирани кон север. На растенијата со светла боја на листовите им е потребно повеќе светлина од останатите, а ако секој ден ја свртувате саксијата за 180 степени, ќе им овозможите рамномерен раст од обете страни.

Доколку растенијата во вашиот дом се исушуваат брзо по наводнувањето, тогаш пресадете ги во нова саксија, а пред да додадете земја и ѓубриво, на дното од саксијата поставете влажен сунѓер. Ќе послужи како резерва на вода и ќе го спречи сушењето, но и протекувањето на водата од саксијата.

За растенијата да бидат што побујни и поубави, приредувајте им „чајанка“ одвреме-навреме. Да, чајот или влажните ливчиња од чаевите се одлична храна за билките и земјата, па доколку ги залевате повремено со чај, ќе им пружите вистинска витаминска инјекција.

Понатаму, немојте да ги фрлате остатоците од сода бикарбона и јајца. Минералите кои се содржани во содата го потпомагаат растот на зелените билки, а за најдобар ефект, потребно е да го користите овој трик еднаш неделно.

Што се однесува до јајцата, откако ќе ги сварите, не ја фрлајте водата во која сте ги подготвувале. Наместо тоа, залејте ги саксиите, бидејќи во оваа вода се содржани бројни хранливи материи што се корисни за растенијата.

Ако домот ви го красат големи билки кои се тешки за поместување, под саксијата поставете подлога за компјутерско глувче. На тој начин, ќе ги избегнете гребаниците и уништувањето на подот, а ќе можете и полесно да ги преместите билките за време на чистењето.

За совршен сјај на листовите, пак, најпрво помешајте топла вода и млеко. Потоа, натопете парче ткаенина во течноста и поминете го секој лист со неа. Покрај оваа комбинација, сјај на листовите можете да постигнете и со помош на мајонез, кој нежно се втрива на листот со хартиен бришач. Блескавиот сјај е загарантиран во наредните неколку недели, а можеби дури и месеци.

М. А. | Црнобело