Совети за одгледување домашен папрат – Растение кое го прочистува воздухот (и не бара многу светлина)

Домашниот папрат е растение кое не бара многу грижа, изгледа убаво, а притоа и го прочистува воздухот. Како правилно да се грижите за него?

Домашниот папрат (Nephrolepis exaltata) е растение кое се одгледува како собна билка.

За него е карактеристично тоа што не бара многу грижа, погоден е за внатрешни простории во домот или канцеларии каде што нема доволно светлина, а притоа го разубавува ентериерот, но и го прочистува воздухот.

Неколку совети за одгледување домашен папрат:

Идеално место за поставување на папратот

Домашниот папрат одлично ќе преживее во простории со висока влажност како, на пример, во кујната или бањата.

Исто така, добро му одговараат и места во домот без директна сончева светлина или некаде на сенка, каде што не е блиску до провев или извори на топлина, како радијатори и греалки.

Оптималната температура за ова растение е 18-20 степени во лето и 14-15 степени во зима.

Папратите имаат најубав изглед кога светлината им доаѓа подеднакво од сите страни, па затоа често се одгледуваат и во висечки саксии.

Каква почва му треба на собниот папрат?

Ако се одлучите самите да засадите или да го пресадите вашиот собен папрат, тогаш препорачливо е да користите компост од тресет.

Важно е почвата секогаш да биде влажна – во летните месеци залевајте го до трипати неделно, а во зима доволно е еднаш неделно.

За уште подобар и поздрав изглед на вашето растение, од април до крајот на септември прихранувајте го на секои две недели со вода во која е додадено течно ѓубриво за лиснати растенија.

Имајте на ум дека ова растение сака висока влажност, а ако немате доволно влажност во просторијата каде што го чувате, може да ја зголемите така што ќе го засадите во пластична саксија и ќе ставите каменчиња во садот под саксијата.

Недостатокот на влажност ќе го забележите по тоа што листовите ќе станат кревки и кршливи.

Како да го размножите собниот папрат?

Крајот на зимата и почетокот на пролетта се исклучително погодни периоди за размножување на ова растение.

Тоа се размножува на следниов начин:

• Се вади од земја со неговиот корен
• Се дели на два дела
• Двата дела се засадуваат во посебни саксии

Исто така може да го засадите и од семе.

Што се однесува до изборот на саксија, за ова растение подобро е да изберете пластичен сад, за разлика од земјен, затоа што на овој начин подобро ќе се задржи влагата.

Интересно е тоа што папратот има својство да го прочистува воздухот. Според студија спроведена од страна на НАСА, собниот папрат е можеби најдобриот избор ако целта ви е да го прочистите воздухот во домот.

Со соодветна грижа, малку време и почитување на правилата за одгледување, во домот ќе имате прекрасно украсно растение кое не само што ќе ви го освежи домот туку ќе ви биде и прекрасна декорација.

М. Ѓ | Црнобело / фото: freepik.com