Уникатен цвет со боцки: Совети за одгледување Исусов трн

Иако е мошне едноставно растение за одгледување, Исусовиот трн спаѓа во отровните билки со кои треба да бидете особено внимателни. При пресадување, носете ракавици поради отровниот млечен сок, кој се создава со кршење на стеблото и листовите, а може да ги иритира кожата и очите.

Исусовиот трн (Euphorbia milii) е повеќегодишно растение кое расте и до 180 сантиметри во височина. Гранките се густо покриени со трње, листовите му се овални, долги до 35 сантиметри, широки 15 милиметри, а цветовите се ситни и може да бидат во жолта, бела, црвена или розова боја.

Како да одгледувате Исусов трн?

Исусовиот трн природно е распространет во Мадагаскар, а на нашите простори се одгледува како украсно растение во затворен простор.

На ова растение му одговараат сончеви позиции и сув воздух, но и добро дренирана почва.

Толерира собна температура, во зима може да се чува и во загреана просторија, а минимална температура на која може да го изложите е до 8°C.

Во лето, залевањето треба да се врши умерено, а да се прихранува на секои 2-3 недели со течно ѓубриво, додека пак во зима наводнувањето треба да се намали и да се наводнува толку колку само да не се исуши коренот.

Пресадувањето на ова растение се врши по потреба, кога коренот ќе ја надмине големината на саксијата, вообичаено на секои 2-3 години.

Што се однесува до размножувањето, тоа се прави со резанки долги околу 7-10 сантиметри и тоа во пролет. Кога резанките ќе се вкоренат, треба да им се исечат врвовите, за растението да се разграни и да формира грмушка.

Напролет, кога ноќните температури не се спуштаат под 16°C, Исусовиот трн може да го извадите на отворено. Обликот и големината на грмушката ќе го постигнете со режење, слабите или тенки гранки се отстрануваат на есен, а ова ќе го стимулира растот на растението во пролет.

Исусовиот трн цвета во текот на целта година, но најчесто од рана пролет до доцна во лето.

За да се намали ризикот од габични заболувања, треба редовно да се отстрануваат сувите цветчиња и листови.

Може да се случи листовите на растението да почнат наеднаш да паѓаат, а ако тоа се случи во зима, најверојатно Исусовиот трн го чувате во премногу студена просторија.

Опаѓањето на листовите може да биде предизвикано и од честото менување на положбата на растението, но и од прекумерното залевање со вода.

Во тој случај, еден месец наводнувањето треба да биде минимално, по што ќе почнат да се појавуваат нови ливчиња.

Бидете внимателни поради неговата токсичност

Иако е мошне едноставно растение за одгледување, Исусовиот трн спаѓа во отровните билки со кои треба да бидете особено внимателни. При пресадување, носете ракавици поради отровниот млечен сок, кој се создава со кршење на стеблото и листовите, а може да ги иритира кожата и очите.

Доколку се проголтаат, сите делови на растението се отровни за луѓето и за домашните миленици, при што може да се дојде до состојба на мачнини и повраќање.

• 
• 
• 
• 
• 
• 
• 
• 
• 
• 
• 
• 
• 
• 
•  

М. Ѓ | Црнобело / фото: pixabay.com