Декорација во домот и додаток во храната – Како да одгледувате босилек?

Билките сѐ почесто се наоѓаат во домашните градини, а босилекот е дефинитивно растение кое ќе го збогати и раззелени вашиот дом, а притоа ќе имате одличен додаток за храната.

Босилекот може да го чувате во саксија или во тегличка на тераса или во кујна покрај прозор, а ќе изгледа декоративно и притоа секогаш ќе го имате при рака за готвење.

Вкусен е и одлично се вклопува во јадења како пица, тестенини и салата, а најдобро е ливчињата да се додадат на крај свежи или пред да биде готово јадењето.

Босилекот е и главна состојка на пестото, па може да ви се најде доколку сте љубител на овој италијански сос.

Ова растение има и лековити својства - помага за смирување на желудникот, релаксација и намалување на главоболка, а за таа цел се користи како чај, подготвен со свежи или суви ливчиња.

Во летните месеци може да ви послужи и како додаток во омилените пијалаци како мохито или џин-тоник, а ќе даде одличен шмек.

Како да го одгледувате босилекот?

Босилекот воопшто не е тежок за одгледување, но треба да обрнете внимание на неколку работи:

Најдобро е да го посадите пред да почнат големите жештини, а ако имате повеќе исти билки во една саксија или во градината, важно е да има растојание од 30-40cm помеѓу нив.

Теглата или саксијата најдобро е да се чува покрај прозор за да има доволно сончеви зраци, но не премногу за да не се исуши од топлото.

Босилекот сака умерено топла клима и околу 6 часа сонце дневно, а најниската температура на која опстанува е 10 степени. Ако го чувате на тераса, нека биде на место каде што има доволно светлина, но не да го грее сонце цел ден.

Се наводнува кога ќе забележите дека земјата е сува, но избегнувајте да ги полевате листовите. Во лето кога е многу топло, може да се наводнува секој ден.

Како да го сечете босилекот?

Немојте да ги кинете ливчињата кога нема многу и не ги вадете сите одеднаш, доволно е да исечете 3-4 ливчиња одеднаш.

Листовите може да ги сечете кога билката има барем 6 листови и е порасната доволно.

Ако сакате растението постојано да расте и да го користите како додадок во исхрана, а не само како цвеќе, треба постојано да го сечете.

Кога босилекот ќе почне да раѓа цветови, треба редовно да ги сечете тие делови, за да поттикнете раст на нови ливчиња.

Погледнете и идеи за Саксии со свежи зачини - практична декорација за кујна и тераса (фото)

М. М. | Црнобело