Совети за одгледување на висечките јагоди во саксии - свежо овошје од тераса или двор

Ќе ги засадите еднаш, а повеќе години ќе имате свежи јагоди во текот на целото лето – како да одгледувате јагоди во саксии на тераса или во двор?

Кај нас се нарекуваат и „јагоди месечарки“, а познати се по тоа што постојано раѓаат во периодот на вегетација и тоа некаде од средината на мај, па до појавата на првиот студ во есен.

Имаат значително помал плод од јагодите што може да се најдат во супермаркетите и на тезгите, но ќе изгледаат декоративно во вашиот двор или тераса, а ќе имате свежо овошје во секој момент.

Станува збор за повеќегодишно растение, а за нив не е потребна некоја особена нега.

Кога засадувате вакви јагоди во саксии треба да запомните неколку важни работи, што ќе ви овозможат растенијата добро да се развијат и да бидат здрави во текот на целото лето.

За вашите садници ќе треба да изберете место каде ќе добиваат од 6 до 8 часа сончева светлина, особено во периодот на раст.
Колку повеќе се изложени на светлост, толку плодовите се повкусни.

Земјата за јагоди треба да биде со добар квалитет и добро би било пред да ги засадите јагодите да ја измешате со компост или со малку песок.

Садниците се пресадуваат во влажна почва и тоа точно до делот каде што почнуваат жилите од коренот, за растенијата да не изгнијат.

Доколку садите повеќе стебла во една саксија запомнете дека растенијата треба да бидат на најмалку 20 cm оддалеченост.

Станува збор за растенија што се мошне лесни за одгледување. Освен што повремено саксиите ќе треба да ги чистите од несаканите растенија и треви што би можеле да израснат, потребно е само да обрнете поголемо внимание на залевањето.

Доколку растението е презаситено со вода, може да изгние, па затоа мора да внимавате кога ги наводнувате да не ставате премногу вода.

Растенијата потребно е да се наводнуваат веднаш штом ќе забележите дека почвата повеќе не е влажна.

Освен што можете да ги засадите во обични саксии и жардињери, можете да направите и градина во висечки саксии, а пред почетокот на првиот мраз потребно е да ги внесете на топло, да ги прекриете со најлон и повремено да ги залевате.

Прочитајте и Како да си направите градина, дури и ако живеете во стан?

Б. С. Б. | Црнобело