Во домот на Дијана во Германија: Стан од 75м2 уреден според Монтесори – со мини тоалет, сушара и едукативни играчки

Детали

сабота, 04 мај 2024

„Важно ни беше синот Лео (2) да има свое ќоше во секоја соба од домот. Се потрудивме да му го овозможиме тоа ставајќи му мали предмети на располагање кои се слични на нашите, како што се: мини wc, лавабо, мини масички, сушара за алишта, мали предмети во кујната и мала библиотека, а заради среденост имаме минимален број на предмети и декорации“ - раскажува Дијана од Тетово за CRNOBELO.com.

Дијана Галески од Тетово, веќе 5 години живее во Германија со нејзиниот сопруг, а таму се родил и нивниот син Лео, кој сега има 2 години. 

Тие го воспитуваат синот според Монтесори методата, а токму така е уреден и нивниот дом, кој се наоѓа во Лајпциг. 

Станот од 75m2 е уреден внимателно, така што бил безбедна средина за нивниот син од најмала возраст, со што не биле принудени да му ја ограничуваат слободата на движење. 

Освен тоа, неговата соба е уредена минималистички, со потребните едукативни играчки и парчиња облека, кои се лесно достапни за него и организирани на интересен начин. 

Во домот имаат катче за синот во речиси секоја соба, па така тој помага во готвењето во кујна со помош на специјална скала, но и во бањата има свое мини купатило кое може да го користи сам. 

За уредувањето на домот, Дијана за CRNOBELO.com раскажува... 

„Во станот се преселивме кога Лео имаше 10 месеци и лазеше. Беше многу активен и како и секое дете сакаше да го истражи секое ќоше од станот.

За да си го олесниме животот решивме да го направиме станот безбеден за него и наместо да ја огранчиме неговата слобода, се фокусиравме на ограничување на предметите во домот.

Исто така од голема важност ни беше Лео да има свое ќоше во секоја соба од домот. Се потрудивме да му го овозможиме тоа ставајќи му мали предмети на располагање кои се слични на нашите, како што се: мини wc, лавабо, мини масички, сушара за алишта, мали предмети во кујната и мала библиотека.

Интересно за мини купатилото е што не е така купено, туку е правено од предмети кои може секој да ги најде и искористи за оваа намена.

Шкафчето го направивме ние, садот е за салати, но ние го пренаменивме за лавабо, така што му направивме дупки.

Долу има кофа за да тече водата, а наместо теглата која служи како чешма, може да се користи и пластично шише со таков механизам за поголема безбедност. И јас би го сменила.

Од една страна, сакав Лео да се чувствува добредојден во домот, но од друга страна многу ми пречеа расфрлани играчки во дневната соба. Тоа беше и една од причините зошто се одлучивме дома да ја практикуваме Монтесори методата на д-р Марија Монтесори.

Практичност од една страна и удобност од друга. Тоа беа главните карактеристики кои ни беа важни при опремување на станот.

Бидејќи се работи за стан од 75м2 се потрудивме максимално да го искористиме секој дел, а притоа секој дел да го поделиме на два дела: место за нас и место за Лео.

Продолжува на следната страница...