На гости кај Пале: Стан од 116m2 во Струмица во класичен стил со драпери, мебел од цреша и раскошни детали (фото)

Детали

сабота, 21 декември 2024

„Цели 28 години живеевме во куќата на мојот сопруг, заедно со нашите две деца. Но, кога децата пораснаа и син ми се ожени, на нив им ја препуштивме куќата, а јас и сопругот се преселивме во стан“, ја започнува Пале Стојанова приказната за уредувањето на домот за CRNOBELO.com.

Пале Стојанова, менаџер и дизајнер во салон за уредување со завеси и драпери, е мајка на син, дизајнер за мебел и ентериер и ќерка, моден дизајнер и ликовен уметник, како и сопруга на поранешен старешина во армијата, сега пензионер.

Исто така ја има и улогата баба на три внучиња.

Таа со сопругот живее во стан од 116m2 во Струмица, уреден во класичен стил со раскошни детали.

Вели дека при секоја можност кога патува во Европа посетува стари музеи и замоци кои имаат историско значење, а ја привлекуваат со изгледот во внатрешните простории каде што е присутна класичната уметност и орнаментиката, луксузниот дизајн кој потекнува од времето на ренесансата, па токму оттаму и ја црпела инспирацијата за уредувањето.

За уредувањето на домот Пале открива за CRNOBELO.com:

„Цели 28 години живеевме во куќата на мојот сопруг, заедно со нашите две деца.

Но, кога децата пораснаа и син ми се ожени, дојдовме до момент каде имавме потреба од повеќе простор, па нив им ја препуштивме куќата, а ние со сопругот се преселивме во станот во којшто живееме денес сами двајцата.

Станот е 116m2, и во него има: влезен ходник, десно од него се влегува во дневниот престој, а лево се влегува во друг ходник преку кој се доаѓа до двете спални соби, главната бања и работната соба, којашто ја користиме заедно со сопругот.

Станот располага и со две комотни тераси.

Уредувањето на новиот дом не ми претставуваше тешка филозофија, бидејќи јас имам свој стил и се водам од него, а во извршувањето секако бевме вклучени сите четворица.

Отсекогаш душата ми ја исполнува класичната убавина, па затоа и стилот во дневниот престој е не случајно избран да биде класика.

Со работата со којашто се занимавам, имам влезено во безброј домови од мои клиенти и имам видено станови уредени во различни стилови.

Секој стил си има своја убавина, но јас уживам во класиката и за мене таа дава совршена елеганција, раскош, хармонија, топлина и луксузен комфор.

За мене класиката претставува безвременска елеганција, па затоа, во мојот дом дневниот престој е уреден со комбинирање на класична елеганција со практични удобности.

Мебелот за во дневната соба го имавме веќе 25 години, задачата ми беше само како да го распоредам секое парче на соодветно место.

Па затоа, кујната како што беше отворена, еден дел преградивме за едниот тросед да добие цела позадина.

Местото на ТВ комодата по логика се најде веднаш наспроти гарнитурата за седење, ќош-витрината се намести во аголот помеѓу двата троседи, а високата витрина и ниската комода со огледало една наспроти друга, па честопати знам заради мала промена да им ги сменам местата.

Продолжува на следната страница...