Atlantis Books - книжарница на Санторини што го освојува секој читател

Детали

недела, 17 јуни 2018

Сите посакуваме да отпатуваме на Санторини, вулканските острови сместени во Егејското море, некои од нас веќе ги имаат и посетено, но, кој и да стапнал на оваа грчка дестинација, сигурно ја забележал книжарницата Atlantis Books.

Фасциниран од самата книжевна атмосфера, дознав дека книжарницата е отворена во пролетта 2004 година, но нејзините почетоци се размрежувале уште во 2002 година, откако двајца пријатели, Оливер и Крег, поминале недела дена на Санторини.

Инспирирани од убавината на островот и фактот што немало книжарница, одлучиле да отворат една. Отворањето на книжарницата била водена од задоволување на своите желби и соништа, а финансискиот дел воопшто не бил пресуден за реализирање на идејата.

И така, група на пријатели од Кипар, Англија и Америка, повторно допатувале на Санторини, подготвени да ја отпочнат приказната за Atlantis Books.

Нашле мачка и куче, како верни придружници, отвориле сметка во банка и аплицирале за лиценца.

Со сопствени раце направиле полици, кои ги пополниле со книги и откако сé било подготвено за стартување, целата книжарница со вкус била декорирана.

Ова независна книжарницата, каде може да се најде секаков вид на литература и чија внатрешност потсетува на куќарките од Хобит е простор за секој љубител на книги, на луѓето жедни за нови приказни и доживувања.

Балконот што е во склоп на Atlantis Books ќе ви овозможи релаксирачка атмосфера за читање, додека уживате во скротувачки бранови на Егејското море и поглед кој смирува.

Основачите на книжарницата редовно организираат книжевни настани, си имаат свој клуб на читатели, како и фестивали посветени на храна и филм.

Покрај Shakespeare and Company во Париз, и книжарницата Лело во Порто, кои сите ги знаеме, Atlantis Books е уште едно магично место каде светот на реалноста и фикција се испреплетуваат, каде книгите едвај чекаат да се сместат во рацете на читателот.

Не заборавајте, ако планирате летото да отпатувате на Санторини, тогаш овој простор ќе ви ја разбуди имагинацијата и ќе ве натера да читате уште повеќе.

Автор: Евгениј Хоуп | Црнобело