Традиционална боза: Подгответе здраво и вкусно летно освежување

Бозата е еден од омилените пијалаци на овие простори. Освежителна и вкусна, но и многу здрава. Познати се вечерните излегувања од времето на родителите кои оделе на слатко и боза во „Апче“.

Денес сè помалку има слаткарници во кои може да се најде вкусна и квалитетна боза која совршено одговара во топлите летни денови.

Ако собирате старо друштво или повозрасни роднини и пријатели, сигурно пријатно ќе ги изненадите ако ги потсетите на старите добри времиња преку традиционалниот вкус на бозата која може и сами да ја подготвите.

Состојки:

• 5 литри вода
• 4 супени лажици пченкарно брашно
• 1 супена лажица пченично брашно
• ½ мала коцка свеж квасец или 1 кесичка сув квасец
• 400 g шеќер

Подготовка:

Во поголемо тенџере, отприлика 7l, налејте 5l вода и ставете ја на шпорет да зоврие.

Во еден сад разматете 4 полни супени лажици пченкарно брашно и 1 полна лажица пченично брашно со малку вода, како за пудинг.

Таквата мешавина истурете ја во тенџерето со вода која врие. Намалете ја температурата и оставете да се вари околу половина час.  Не е задолжително постојано да мешате, само повремено.

Кога ќе биде сварена оставете да се излади и додајте го квасецот разматен во малку млака вода со малку шеќер. Оставете да отстои 24 часа, потоа процедете ја.

Благо карамелизираниот шеќер, потопете го во ½ l вода и оставете го да се провари. Откако ќе се излади додајте го во процедената течност, добро измешајте и сипете го во шише.

Ставете ја во фрижидер за убаво да се излади, а потоа послужете ја и изненадете ги пријатно домашните и пријателите.

Ако брзо ја испиете и сакате повторно да направите, зачувајте пола литар боза, наместо квасец кој ќе го додадете.