Одличен летен ликер: Направете домашно лимончело

Лимончелото е познат италијански ликер со цитрусни ноти кои се одлична идеја за освежување во летните периоди. И токму така, за оние кои едноставно не сакаат само лимонада за освежување, туку сакаат и алкохолен, а сепак освежителен пијалак, може да се одлучат токму за овој рецепт.

Не мора да одите до Италија за да го купите, туку сами може да го подготвите. Можеби малку ќе треба да го почекате, но тоа вреди. Ќе добиете одличен ликер кој можете да го консумирате како чист, така и за правење на одлични домашни коктели.

Потребни состојки:

• 11 Лимони
• 1750ml Вотка
• 560g Шеќер
• 630ml Зовриена вода

Начин на подготвување:

Исечкајте ја кората од лимонот и притоа внимавајте што е можно помалку од белиот дел да зафатите и лимоните оставете ги за друга употреба.

Додадете ги корите од лимон во шише кое собира 2l течност заедно со вотката.

Оставете го шишето да седи 3 дена, а откако ќе поминат тие 3 дена во него ќе го додадете шеќерниот сируп. Тој претходно го подготвувате на тој начин што во зовриената вода го додавате шеќерот и го мешате се додека не се растопи целосно.

Шишето ставете го во ладилник цел еден ден. Потоа исцедете го лимончелото и фрлете ги корите лимон.