Три летни коктели за гостите на вашата забава

Ако сте од оние среќни луѓе кои имаат голем двор или балкон, соберете го вашето друштво на летна забава со добра музика, храна и секако, неизбежните летни коктели, кои можете да ги подготвите и дома.

Три рецепти:

Мохито со краставица

Половина краставица исечете ја на тенки кругови. Сок од пет лимети измешајте со пет лажици кафеав шеќер и 300 милилитри бел рум. Во осум чаши ставете мраз.

Настрана измешајте ја добиената смеса од лимета, шеќер и рум со еден литар минерална вода.

Сипете ја течноста во чаши, додајте по неколку парчиња краставица, неколку ливчиња нане и украсете со парчиња лимета. Доколку имате повеќе гости, дуплирајте ја количината.

Коктел од шампањ и праски

Во голем сад истурете го шишето шампањ и во него додајте 100 милилитри сок од праска. Доколку сакате поинтензивен вкус на праска, зголемете ја количината на сок или пак додајте парчиња свежа праска.

Распределете го коктелот во осум чаши и украсете со нане и босилек.

Коктел од шампањ со вкус на шумски овошја

Овој коктел наликува на сангрија со бело вино или т.н. „бунар“. Еден лимон измијте и исечете го на парчиња. Ставете го во сад со листови од нане од еден врзоп.

Додајте шеќер и сипете 750 милилитри бело вино по избор. Мешајте додека шеќерот не се стопи. Додајте 100 милилитри ликер од рибизли и 250 милилитри сок од боровинки и врз сета мешавина сипете едно шише шампањ.

По желба можете да додадете и две грутки од смрзната мешавина од шумски плодови. Оваа количина е доволна за 16 до 18 чаши пијалак.

Е. Д. | Црнобело