Сања Мишковски за одморот на Тасос: „Бевме сместени во Скала Потамиа, островот има рајски плажи, а две лежалки се околу 20 евра“

Посетивте ли некое живописно селце, манастир, локација? Зошто ти се допаднаа?

Успеавме да посетиме едно прекрасно селце со уникатен пејзаж и интересна архитектура – селото Панагија.

Има бујно зелена вегетација и ноти на бор, кои продираат во воздухот. Селото е густо населено, со тесни улички направени од камен и богато со извори на свежа вода.

Најпознат извор е „Извор на љубовта“, кој претставува еден од главните туристички атракции во Панагија.

Зошто токму во јуни? Имаше ли туристи и од каде беа?

Го одбравме јуни како месец за море, поради не многу високите температури (до 25 Целзиусови степени) и помалиот метеж од туристи бидејќи сè уште не е отпочната сезоната за летување.

Присутните туристи најчесто беа од Романија, Србија, Бугарија и Македонија.

Убава ли е природата? Дали е ова најсилниот адут на островот?

Верувам дека секој остров има свој шарм и по некоја специфичност по што се издвојува и запаметува. Токму убавата богата природа која нуди спокој е причината поради која ќе се вљубите во ова место.

Комбинацијата на сино зелена боја на морето, златен или бел песок, мирисот на бор и мед е одличен избор за одмор и полнење на градите.

Колку часа трае патот до таму и колку патувавте со траект?

Патувањето воопшто не е напорно. Се патува околу 5 часа со автомобил или 6 часа со автобус, а патувањето на траект е околу 40-тина минути.

Картата за траект за автомобил е 35 евра, а за автобус е 20 евра по лице.

Какви беа цените на островот-лежалка, кафе, гиро, пиво?

Со оглед на тоа што сè уште не беше отпочната сезоната, цените беа релативно пристапни, но кон средината на јуни почнаа постепено да се зголемуваат.

Па, така кога пристигнавме (почеток на јуни) лежалките главно беа бесплатни, со опција за кафе/храна, а кон средината на јуни нивната цена изнесуваше околу 20 евра.

Цената на кафето е околу 5 евра, гиро околу 4 евра, локално пиво 7 евра, пица околу 12 евра, вафла околу 11 евра, грчка салата 7 евра итн.

Го препорачуваш ли Тасос како дестинација за летување за млади, возрасни и семејства со мали деца?

Секако! Како што напоменав, Тасос е место кое нуди услови и забава за секоја генерација.

Плитката чиста вода, песочните плажи, боровата вегетација и чистиот воздух се одлични за малите деца, но секако и за сите нас, особено по долгите периоди на загаден воздух.

Верувам дека секој што ќе го посети, ќе има можност за вистинска релаксација, забава и авантури. Топло го препорачувам.

Повеќе фотографии на следната страница...