Стефан и Милан за патувањето на Исланд: „Пржевме колбаси на -10°C под Аурора Бореалис“

Кои се уникатните места и искуства што го дефинираат Рејкјавик, а никој патник не смее да ги пропушти?

Модерната бетонска црква, Халгримскиркја, која го одликува Рејкјавик е монумент кој не смее, а и не може да се пропушти од секој турист. Досега не сме виделе црква направена од бетон, па и таква си имаше некоја елеганција сама по себе.

Внатре ги содржи оргулите на кои познатиот музички композитор Ханс Зимер ги има компонирано голем дел од неговите дела за филмови, меѓу кои и „Interstellar“ на Кристофер Нолан.

Гледање на поларната светлина за многумина претставува животна искуство. Тоа е еден од моментите што го и дефинира патувањето на Исланд. Раскажете ни ја целата екскурзија. На кое место отидовте за да ја видите Аурора Бореалис?

Милан: Ептен нè изненади поларната светлина, нè добредојде уште на вториот ден во Исланд, т.е во градот Селфос.

Стефан: Само што ги паркиравме камперите, спремавме јадење и мене ми зафали нешто што го оставив во комбето, излегувам од кујната и само гледам небото некако чудно и необично, и наеднаш пред мене експлодира целата таа зелена светлина, и како добар другар отидов и ги повикав и другите што беа внатре во кампинг сајтот, за да го искусат она што јас го искусив. И не, не испушта поларната светлина никаков звук.

Во вашата патувачка агенда се најде и плажата со црн песок, Reynisfjara. Што ви остави најголем впечаток од целото доживување?

Стефан: Уште кога слетувавме во Исланд забележавме дека целата почва е црна, тоа беше доста необично искуство за нас. Плажата со црн песок беше доста воодушевувачка и уникатна.

Милан: Јас сум бил на слична црна плажа на Канарските Острови пред некоја година, но оваа беше далеку поцрна и навистина вулканска.

Таму нè предупредија за така наречените sleeper waves кои се подмолни бранови кои навидум личат на нормални бранови, но всушност повлекуваат голем дел вода, при што можат лесно да однесат возрасен човек во ладните океански води.

Плажата нè пречека со екстремно силен ветер кој е исто така закана за вратите на возилата кои излезе дека прилично често биле откачувани од ветерот. Па така, ако изнајмувате кола во Исланд, да си знаете дека осигурувањето не го покрива тој дел.

За Исланд кружат различни приказни и легенди. Кои легенди најчесто се прераскажуваат?

Највеќе се зборува за морски чудовишта или на исландски „скримсли“ кои пливале во водите кои го опкружуваат Исланд.

Исто така, во Вик, каде што е плажата со црн песок, успеавме да ги видиме и Троловите на Вик, за коишто има легенда која вели дека тие биле вистински тролови кои биле скаменети од утринското изгрејсонце.

Какви се локалците? Успеавте ли да поразговарате со нив и да дознаете какво е нивното секојдневие?

Немавме некоја комуникација со локалците, но успеавме да заклучиме дека живеат доста добар живот и си ги користат природните богатства.

Базените и термалните бањи беа преполни со народ уште во 7 часот наутро, си го започнуваат денот луѓето со опуштање во термална вода.

Продолжува на следната страница...