Теона Манго го посети Мексико: „Тулум е рај, а локалците се фини, но знаат да лажат за да ти земат повеќе пари“

Чичен Ица е сон за сите патувачи и авантуристи. Какви беа твоите доживувања од ова светско чудо?

Чичен Ица ми беше прво на списокот од места кои морам да ги посетам во Мексико и морам да признаам дека очекувањата ми беа надминати.

Бев запрепастена од тоа колку добро архитектонски се изградени пирамидите, акустиката, поврзаноста на архитектурата со астрономијата, и воедно колку добро е сè сочувано денес.

Беше навистина волшебно да се чекори на истото место каде што пред илјадници години живееле Маите…

Што имаш да споделиш за Плаја дел Кармен, Козумел и Ваљадолид…?

Мислам дека од сите овие, Ваљадолид ми беше фаворит, некако од сите 3 места успеале да го задржат да остане автентичен мексикански град, со шарена архитектура, локални продавнички и ресторанчиња кои имаат само едно јадење на денот.

Лично Плаја дел Кармен и Козумел ми беа премногу американизирани и наменети за туристите што застануваат тука со бродовите за крстарење. Од ланци на ресторани, до ресорти, аквапаркови и зоолошки за играње со делфини.

Како ги доживеа локалците? Каква беше комуникацијата со нив?

Локалците беа многу фини и гостопримливи (иако имаше и такви што сакаат да те излажат и да ти земат повеќе пари).

Мислам дека Мексиканците се многу питом и топол народ, искрено очекував дека ќе ги мразат туристите, но бев многу пријатно изненадена од тоа колку се гостопримливи и услужливи.

Англиски зборуваат малку, така што доколку знаете шпански е огромен плус и олеснителна околност, особено за преговарање околу цена.

Што имаш да кажеш за мексиканската храна?

Не знам дали фактот што доаѓав од САД каде што храната генерално, особено овошјето и зеленчукот, нема никаков вкус, но сетилата за вкус во устата ми експлодираа од тоа колку вкус имаше буквално сè.

Сè беше толку вкусно подготвено и свежо. Најмногу се радував на уличната храна која нè само што беше евтина туку беше и превкусна. Сè што јадев, од севиче, до бурита, до такоси беше феноменално.

Што најмногу ти остана при срце, а што ти пречеше од патувањето во Мексико?

Најмногу би рекла природата и храната, поради овие две работи би се вратила Мексико уште барем три-четирипати.

А, не ми се допаѓаше тенденцијата на локалците да те излажат и да ти земат повеќе пари, особено во местата каде што има најмногу американски туристи како Канкун, Козумел и Плаја дел Кармен.

Зошто секој треба да го посети Мексико барем еднаш во животот?

Мислам дека е дестинација која вреди да се посети од аспект на знаменитости, историја и природа. Има многу што да се види и искуси.

Од древни цивилизации, до прекрасна природа и природни феномени како сеноти, до светски добри забави и одлична храна.

© CRNOBELO.com Забрането преземање и копирање. Крадењето на авторски текстови е казниво со закон.

Е. Х. | Црнобело