Христијан Стојаноски го посети најбајковитото холандско селце: „Најубаво се доживува со бротче кое го управував сам“

Детали

недела, 22 септември 2024

„Како пловевме низ каналите, така почнаа воздишките предизвикани од убавините пред нас - куќи на вода, мостови, црквички, зеленило... Градбата на куќите и самата декорација околу нив изгледаа многу автентично и сосема поразлично од сè што сум посетил“, вели кичевчанецот Христијан за посетата на Хитхорн, уникатното место во Холандија.

Христијан Стојановски од Кичево, наш интернационален модел, со својата работа, но и приватно, посетил многу европски и азиски земји.

Но тој неодамна беше во Холандија и по неколку дена поминати таму, вели дека оваа држава сега е на врвот на листата на негови омилени земји.

Покрај Амстердам, Христијан го посети и Хитхорн, селото на вода, каде нема улици, туку канали, а луѓето не возат автомобили, туку чамчиња.

За своето необично и авантуристичко патување, тој раскажа за CRNOBELO.com:

„До Хитхорн стигнав преку организирана тура со автобус, а се патува околу 2 часа од Амстердам.

Цената до самата локација изнесува 80 евра, и тука беа вклучени превозот со автобус, локален водич и тура со бродче околу каналите.

За жал, првите билети што ги купивме ни пропаднаа поради тоа што доцневме 3-4 минути и стигнавме на станицата откако заминал автобусот, па моравме да платиме уште по 20 евра од човек за да ги поместиме картите за наредниот ден.

Времето беше свежо и по малку врнежливо, како студен есенски ден, што е типично за земја како Холандија, но сосема соодветно за локацијата која како да е од бајките.

Кога стигнавме во Хитхорн прво влеговме во еден ресторан за да ручаме.

Цените за главен оброк се движат од 20 до 25 евра. Но, во гратчето или селото (сите го ословуваат различно), имаше и добар избор на кафулиња и интересни места за седнување и одмор.

Бидејќи до враќањето на автобусот кон Амстердам имавме околу 4-5 часа, по ручекот веднаш тргнавме да го истражиме местото.

Јас решив дека сакам да бидам сам свој капетан, па изнајмивме моторно бродче кое се издава за 45 евра од час.

Мислам дека направивме одличен избор, зашто така можеш своеволно да си управуваш каде сакаш, да ја уживаш приватноста на самото место и да ја избираш рутата по која ќе се движиш.

Продолжува на следната страница...