Ноне Неделковска: „Имам морска болест, сум посетила 45 земји, а дефинитивно на брод има многу разврат“

Каков е односот на капетанот на брод со останатите вработени? Колку имате контакт?

Во последно време има многу млади капетани, 35 годишни, 38 годишни а видов и жена капетан. Дефинитивно работите се сменети откако почнав во 2012, тогаш немаше многу контакт со капетанот, освен на некоја забава за вработените и некои значајни национални прослави.

Сега можеш да го видиш капетанот како се шета низ бродот и зборува со вработените, прави шеги, но пак ќе кажам сè зависи од бродската компанија и колку им е во прилог да добиваат позитивни поени и коментари од гостите.

Дали се скапи крстарењата? Колку луѓето од Македонија имаат навика да одат на крстарења со брод?

Зависи од сезоната и на кој дел од светот се крстари. Може да се најде за 7 дена крстарење околу 17.000 денари да се крстари низ медитеранот или 5.000 денари за 4 дена на Бахами. Сум сретнувала Македонци, но не е многу често.

Имаше ли други Македонци на бродот?

Има многу вработени Македонци. Секаде нѐ има, во сите оддели. Најмногу има во ресторан и бар.

Кога ќе се најдеме сите си помагаме и чуваме меѓусебно, сепак е најубаво кога ќе си се расприкажеш со некој што те разбира.

Си се соочила ли со некоја страшна бура?

Фала богу, не. Секогаш кога се најавувало невреме, капетанот одлучувал да преноќи да не се плови. Е тоа е рај за уши на вработените. Посебно за нас во гифт шоп, ние не работиме кога бродот е докиран, мора продавниците да бидат затворени.

Па, веднаш се прави некој договор во кој бар да се оди надвор или некоја прошетка без да брзаш да се вратиш назад на брод. 

Сум била во некоја мала бура, бродот оди горе долу, повраќаници на сите страни, гостите сите во кревет, неубаво чувство, барем за мене.

Најдолго време минато на брод без застанување на копно е?

Најдолго време беше кога го преминувавме Атлантикот од Европа до Кариби во зима. 6 дена пловење, но ни се посреќи бидејќи бевме без гости, па го имавме бродот за нас слободно да се шетаме.

Какви се кабините на бродовите? Имаше ли цимерка?

Прв пат кога ќе дојдеш на брод и ќе те сместат во кабина, ако имаш карта за назад дома веднаш ќе си заминеш. Јас бев во шок прв пат кога видов, плачев, а имав „многу добра“ кабина со прозорец.

Во принцип кабините се слични само распоредот е малку поинаков и и зависи каде работиш.

Најмногу ми е жал за оние коишто се сместени четворица во една мала кабина, а нив им е најмногу потребен одмор. Па, мора да делат wc со уште 50тина други вработени. Тука се гледа дека на компаниите и не им е баш грижа за вработените, но кога се нема друг избор и кога ќе видиш дека Филипинците би работеле во секакви услови, другиве немаат право да се изборат за нешто подобро.

Оддели како казино, гифт шоп, фотографи и спа, делат двајца кабина, има wc во кабината и имаат привилегии да користат сè што користат и гостите.

Дали е напорно да се работи на брод? Имате ли слободни денови? Какво е работното време?

За кого како. Јас можам да кажам да работиш во гифт шоп е најлесно. Работиме само кога бродот плови, значи еве најчесто време за работа ни е од 18.00 до 23.00. 

Единствен ден кога работиме цел ден од 09.00 до 22.00 е ден на море и е еднаш во неделата. Има многу бродски компании и зависно од местото на крстарење и колку денови е крстарењето така и работно време е различно.

Колку земји имаш посетено досега и која ти остави најдобар впечаток?

Имам посетено околу 45 земји. Не сум била во Јужна Америка. Јас сум девојка што гледа секогаш позитивно на сѐ. Така што можам да кажам дека за секаде каде што сум била сум благодарна и имам само добро да кажам за сите разноликости и убавини што ни ги нуди овој свет.

Ќе го издвојам Флам во Норвешка, убавина, зеленило, чисто и смирувачко место. Мртвото море коешто лежи помеѓу Јордан и Израел. Пливањето ми беше забавно и несекојдневно затоа што цело време бевме на површина на водата, невозможно е да се потоне.

Потоа Фуншал, главниот град на Мадеира во Португалија, преубав богат град и имам многу убави пријатни искуства таму. Три часа возење низ пустина во Сахара, незаборавно искуство.

Куба е приказна за себе. Пливање со делфини во Мексико, пливање со ражи на Кајманските острови, карневал во Ла Палма, рајските плажи на Јамајка, највкусната пица во Наполи, египетските пирамиди.

Продолжува на следната страна...