Пар од Скопје за одморот во Ксамил: „Плажите се преубави, но во 9:30 наутро веќе нема слободна лежалка“

Мештаните беа топло настроени кон сите туристи, а многу од нив нè поздравуваа на македонски или српски јазик, додека дел од персоналот во некои локали го знаеја и целосно нашиот јазик.

Класичен центар селцето нема, но има мини тезги поставени на патеката која води кон најголем дел од плажите и рестораните покрај морето. Некои од нив рачно изработените производи или сувенири ги изложуваа и на самиот бетонскиот ѕид од патеката.

Плажи има за сечиј вкус и за секоја генерација, единствениот проблем е тоа што местото важи за семејно, па така за нас помладите малку ни беше невообичаено да нема празни лежалки подоцна од 9.30 часот наутро.

Градот се буди уште во 7 часот наутро, а заспива во 12 часот навечер.

Ксамил е познат по преубавите бели песочни плажи, уникатна и волшебна глетка на тиркизното море како и на добрата забава која ја имаше во дел од кафулињата со диџеи во текот на целиот ден, а дури имаше и пена забави на кои се доловуваше атмосферата слична на онаа на грчките острови.

Местото има и три острови кои можат да се препливаат, да се отиде на нив со кајак или пак со педалинка или бродче, а водата околу нив е навистина проѕирна и се гледаат рибите.

Она што во вистински сјај го опишува ова мало место е зајдисонцето и сонцето кое буквално се топи во морето.

Продолжува на следната страна...