Кристина, наша стјуардеса: „Имам посетено 100 земји, бев на свадба во Индија, партнерот ме запроси во Катар“

Најубавата работа која ти се случила за време на некое патување е…

Пред да започне пандемијава, имав лет за Сингапур. И како и пред секој лет, се собравме сите за да споделиме детали од летот, времетраење, профил на патниците и слично.

Се изненадив кога супервизорката ми кажа дека имаме група од 40 Македонци. Многу, многу е ретко да начекаш наши луѓе на тие летови.

За време на летот сите дојдоа во задниот дел од авионот кај што работев, пееја, се сликавме, се поздравивме, се договоривме да се сретнеме некогаш во Скопје. Ми беше многу драго што ја имав таа чест да бидам на нивниот лет.

Најлошата работа која ти се случила за време на некое патување е…

Ми го изгубија куферот во Чикаго, среде зима. Не можев да излезам никаде, немав ни пижами за спиење со мене. На крајот беше најден, но го добив дури кога се вратив во Доха.

Во Бали се обидував да извадам пари од АТМ машините, и картичката одеднаш ја снема. Сè уште не знам дали некој околу мене успеа некако да ми ја земе или остана заглавена во машината.

Кои се најиритирачките работи кои ги прават патниците во авионите?

Кога сите одеднаш прават ред пред тоалетот за време на сервис, додека сите колички за сервис се во кабината. И мораме да се враќаме назад за секој патник што сака да помине во моментот.

И движењето боси низ авионот! Колку и да се одржува хигиената, подот е многу, многу валкан.

Ме иритира и станувањето веднаш штом авионот слета. Многу е тешко да се објасни дека не е сè уште безбедно за да се стане, сè додека не е паркиран.

Тука е и спиењето на под. Колку што не е хигиенски, не е воопшто безбедно.

Дали стјуардесите имаат добри работни услови и до која возраст би можела да се замислиш да се занимаваш со оваа професија?

Претпоставувам дека условите се слични во сите авиокомпании. Во Катар Ервејс, посебно живееме женски, а посебно машки.

Најчесто становите се за двајца, поретко за тројца. Имаме посебни соби и тоалети, а останатото го делиме.

Цимерка може да ти се падне од која било земја. Јас имав цимерка од Филипините, после тоа од Казахстан и сега од Индија.

Убаво е, пристојно и доволно со оглед на тоа дека многу малку сме во Доха. Престојот и превозот пред лет и после лет ни се платени.

Убава професија е, но не е засекогаш. Доаѓа период во животот кога сакаш да основаш семејство, да имаш деца, и мислам дека би било многу напорно и да леташ во исто време. Додека си помлад и немаш сериозни планови, би рекла дека е совршената професија.

Каков ти е односот со колешките? Имате ли контакт со пилотите? 

Со пилотите имаме минимален контакт. Се среќаваме и запознаваме пред летот и се гледаме уште еднаш после летот.

Во зависност од летот, а најчесто сме многу зафатени, немаме време да им обрнеме многу внимание на нив. Тие си ја вршат својата работа, ние нашата.

Колешките се секогаш нови. Поради големиот број на вработени, многу ретко ми се случило да летам со некој по вторпат. Никогаш не сум имала проблем со никој. Сите се однесуваат пристојно, си помагаме.

Ако не се потпреме едни на други кога сме високо во облаците, на кого тогаш?

Кој ти е најтежок лет?

Летовите за Америка се исцрпувачки! Обемот на работа е огромен. Имаме по 5-6 сервиси.

Секогаш се преполни, со многу бебиња и деца кои бараат посебно внимание. Профилот на патници е различен, па мора да се адаптираш на сите.

Иако имаме одмор од неколку часа, не е доволно за тие летови.

Колку ти е најдолгиот лет?

Лос Анџелес, 16 часа и 30тина минути.

Продолжува на следната страна...