Ангела Блажевскa: „На 19 години ми пресадија бели дробови, операцијата траеше 7 часа, сега слободно дишам“

Денес примаш ли некаква терапија?

Примам имоносупресивна терапија, којашто го намалува имунолошкиот систем, за да спречи телото да го одбие органот.

Треба да бидам активна, да пешачам, да спортувам за да се одржува добра функцијата на белите дробови.

Зошто донирањето на органи треба да престане да биде табу-тема?

Дарувањето органи кај нас е многу голема табу-тема, не знам зошто е тоа така, но се надевам нешто ќе се промени во блиска иднина.

Тоа е и мојата желба и мисија да се поттикне свеста за органодарителството во нашата држава, бидејќи така спасуваме нечиј живот, а тоа е нешто највозвишено.

Колку често правиш контроли?

Првите години правев почесто контроли, сега правам двапати во годината. Одам на контрола во Виена.

Секако, мора да се прават одредени анализи и да се следи состојбата.

Дали уште те мачат проблемите од болеста цистична фиброза?

Не, сега немам никакви проблеми којшто ги имав. Немам потреба од венска терапија, инхалации разни антибиотици и слично.

Сега е сè подобро, сега можам да трчам, да одам да планинарам, ја обожавам планината и чистиот воздух, потоа да возам велосипед и правам сè што ќе посакам.

Можам да кажам дека после трансплантацијата јас почнав да живеам.

Во последно време се прават историски трансплантации на органи во Македонија… Колку ги следиш овие вести?

Да, ги следам и многу сум среќна дека почнаа да се прават трансплантации, барем на некои органи во Македонија, а се надевам дека еден ден ќе можат да се прават и на бели дробови.

Веруваш ли во хуманоста повеќе по донацијата што ја имаше од анонимен донор?

Секако да, тоа во државите во светот е нормална работа некој да дарува органи, дали во текот на животот, дали после смртта.

Би сакала да можев да го запознаам семејството на мојот донор и лично да им се поклонам.

Јас на мојот донор сум му најблагодарна, се трудам да ги користам белите дробови најдобро што можам во мојот втор живот, го живеам со полни гради.

Што би им порачала на сите кои се двоумат околу оваа тема?

Да не се двоумат бидејќи нема ништо похумано од органодарителство.

Дарувајте органи, живејте и после смртта.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело