Марина Стојановска, некогашен ПР менаџер: „Фановите најбурно реагираа на Врчак, Панчо од ДНК е најголем професионалец на сцената“

Веќе долги години не си дел од естрадата... Ти недостига ли некогаш, одењето по промоции, на настани, дружењето?

Животот ме однесе надвор од државата и во сосема други професионални води, така што работата со естрадата сега е само дел од моето минато работно искуство на кое сум особено горда.

Како поддржувач на македонската музичка сцена тоа што ми недостига е што почесто да слушам квалитетна македонска музика на радио; ми недостига да пуштам ТВ и да погледнам македонско музичко видео; ми недостига изборот на музички емисии.

А како некој кој порано бил дел од тој свет, ми недостига преслушувањето песни од албумите кои се снимаа, кои јавноста сѐ уште не ги слушнала, а јас веќе ги знам напамет, дружењето на фестивалите за кое ми кажуваат дека веќе го нема.

Најмногу ми недостига работата на концертите затоа што тие се одраз на успехот на еден артист, а со тоа и мој успех.

Те бараат ли и денес музичари да им водиш ПР?

Да, повремено добивам понуди кои, за жал, ги одбивам затоа што веќе 10 години не сум дел од тој свет.

А и голем број од моите поранешни соработници веќе не се дел од оваа индустрија.

Колегите кои во моментот работат ПР на естрадата се навистина успешни во тоа и топло им ги препорачувам.

Се дружиш ли приватно денес со некој од музичарите со кои работевте? Како изгледаат тие ваши средби?

Секако. Имам нераскинливи пријателски врски со многу од нив, па без оглед колку време се немаме видено или слушнато, нашите средби се проследени со многу гушкање, евоцирање спомени, и меѓусебна поддршка за буквално сѐ во животот.