Дарко Илиевски за татковството: „Синот првата ноќ по раѓањето беше на мониторинг - јас не му ја испуштав раката“

Детали

петок, 22 март 2024

„За синот Матео, идејата за името беше на сопругата, а неговото средно име го избравме заедно. Ќерката што треба да се роди ќе се вика Ана, а нејзино средно име ќе биде Ирена, во чест на мојата прерано почината вујна“, вели пејачот Дарко Илиевски.

Пејачот Дарко Илиевски, кој се прослави со шоуто „Идол“, во екот на најголемата популарност се пресели во Америка. Тој се ожени со Ивана, со која веќе неколку години живеат на Флорида.

Брзо по свадбата тие го добија синот Матео, а во април 2024, вторпат ќе станат родители. Парот сега чека девојче, а за CRNOBELO.com, Дарко откри дека таа ќе се вика Ана.

За деновите додека го очекува раѓањето на ќерката, но и кои се предизвиците со кои се соочил како татко досега, Дарко ни раскажа во интервјуто:

Со Ивана пред неколку месеци откривте дека чекате второ дете и дека ќе биде ќерка. Дали си возбуден што ќе добиеш уште дете, и тоа овојпат девојче?

Многу сум возбуден што Господ нè благослови со уште една принова.

Посебно сум среќен што ќе имам и син и ќерка. Ќерката е секогаш татина маза, па се надевам дека и во овој случај ќе биде така.

Се сеќаваш ли на моментот кога првпат го виде синот? Какво беше чувството?

Да, тоа е еден од моментите во животот кои никогаш не се забораваат.

Матео беше роден во 37-мата недела, па мораше првата ноќ да ја помине под мониторинг, а јас голем дел од времето го поминав со него, држејќи го за рака.

Кога беше бебе Матео, колку ѝ помагаше на сопругата во обврските со него?

Иако можеби не делувам така, јас сум премногу посветен татко и сопруг. Грижата за моето дете никогаш не сум ја гледал како помош за сопругата, туку како моја обврска и пред сè задоволство.

Уште од првиот ден менував пелени, го бањав, пресоблекував и го дохранував Матео.

Во истото време бев посветен и на тоа да ѝ помогнам на Ивана за побрзо закрепнување.

Во текот на короната бев дома и целосно се посветив на растот и на развојот на Матео.

Горд сум на тоа и што имам доволно време да уживам со него.

Дали си од оние татковци што читале или раскажувале приказни или си немал време за тоа?

Матео е посебен по тоа што кога ќе му читаш приказна, тој се вмешува и пробува да ја смени приказната како што му одговара нему, а јас некако немам нерви за тоа, ха, ха.

Ивана е посветена околу читањето и раскажувањето приказни.

Во последно време имаме навика секоја вечер пред легнување да си разговараме за тоа како му поминал денот, што се случило во градинка, што ново научил и што би сакал да направи следниот ден.

Продолжува на следната страница...