Дарко Илиевски за татковството: „Синот првата ноќ по раѓањето беше на мониторинг - јас не му ја испуштав раката“

Кој е најголемиот гаф што си го направил како татко?

Кога беше Матео помал, нонстоп му пуштав гласна музика и игравме. Една од омилените песни му беше „Dame tu cosita“.

Во тој период Матео почнуваше да оди во градинка и знаеше многу често да си пее Dame tu cosita ai ai ai…

По некое време една од учителките, која е по потекло од Јужна Америка, ни кажа дека песната всушност има сексуална конотација.

Ете тоа некако ми е некој гаф на којшто до ден денес се смееме кога ќе ни текне.

Колку од својот карактер препознаваш во карактерот на Матео?

Матео и јас имаме премногу слични карактери. Секогаш сака да бара правда и да докажува дека неговиот став е многу важен.

Сака да е информиран за сè што се случува и во повеќе наврати неговиот глас беше подеднакво важен во носењето на семејните одлуки.

Среќен сум што во мене гледа пример и сака да ги прави истите работи што ги правам и јас.

А на кого личи повеќе, на тебе или на мајка му?

Додека беше помал мене ми личеше повеќе на Ивана, но како расте и има посилни црти на лицето, сè повеќе и повеќе личи на мене.

Имам неколку слики од детството на кои си личиме многу.

Кој го бираше името? Колку се слушаше твојот глас?

За Матео, идејата за името беше на Ивана, а за неговото средно име, Ноа, беше заедничка.

За ќерката која ја очекуваме во секој момент, одлучивме да се вика Ана, а главни виновници за тоа сме Матео и јас.

Нејзиното средно име ќе биде Ирена, во чест на мојата прерано почината вујна, а која има посебно место во нашиот живот.

Која ти е најубавата работа поврзана со татковство? А која ти е најстресна?

Најубавото нешто поврзано со татковството е тоа што без разлика на сè, љубовта која ја добиваш од детето е секогаш чиста и најискрена.

Исто така, секојдневниот напредок на детето и кога гледаш како тоа се оформува во личност е прекрасно чувство.

А најстресно е тоа што во 21-иот век, трката за подобар живот е премногу брза, особено тука во Америка, а тоа се шири и насекаде во светот, па не дозволува да се посветиш на семејството потполно.

Балансирањето на работните и приватните обврски е стресно само по себе.

©CRNOBELO.com Забрането преземање и копирање. Крадењето на авторски текстови е казниво со закон. 

А. Ј. | Црнобело