Анета од Скопје креира производи со дезени инспирирани од македонската традиција: „Сакам да поттикнам интерес за нашата култура“

Кои се најпопуларните дезени и продукти кај купувачите? Генерално, има ли интерес за твоите изработки и кај кој се попопуларни – кај постарите или помладите? Дали правиш дизајни по нарачка?

Дизајни кои предизвикале најголем интерес се: Големата Божица Мајка, Тетовската Менада, Златната маска од Охрид, Ангелот од Курбиново, Џоломар, Вез од Скопска Црна Гора и многу други од различни краеви на Македонија.

Едни од најбараните производи на Акреа се тоте торбите и подметнувачите за чаши.

Нескромно ќе кажам дека концептот предизвика голем интерес и воодушевување што особено ме радува и мотивира.

Повозрасните покажуваат поголем интерес за дизајните со везови, а помладите за дизајните со претстава на археолошките артефакти.

Засега не изработувам дизајни по нарачка, сакам да ја задржам уникатноста на концептот и личниот печат во него. Но, не ја исклучувам и таа можност во иднина.

Постојат ли помалку познати македонски традиции и мотиви кои пробуваш да ги направиш попопуларни преку твоите изработки?

Постојат помалку познати мотиви и традиции чие запознавање е поттикнато токму од дизајните на Акреа.

Ќе ги истакнам мотивите од фреските, обредните маски од карневалите како Џоломари и Прилепски мечкари, мотив од невестинска шминка - свадбен обичај од Скопска Торбешија, мотиви од ентериери...

Секој дизајн крие своја автентична приказна која предизвикува воодушевување кај секого.

Сиот концепт и замисла е преку современиот дизајн и производите, да ја поттикнам промоцијата на нашата богата култура и да поттикнам запознавање и интерес за истата, со посебен акцент на помладите.

Кој ти е омилениот дизајн што си го направила и зошто? А, кој е најкомплексниот, што те измачил најмногу?

Омилени ми се првите мои нацртани дизајни, Вез од Скопска Црна Гора, мојот омилен вез кој ме воодушевува со својата уникатност.

Деталите и боите се толку едноставни, а истовремено и толку моќни и специфични.

Другиот дизајн е Голема Божица Мајка од Тумба Маџари, еден од моите омилени археолошки артефакти.

Најкомплексните дизајни кои ги креирав до сега се Мијачките везови од Лазарополе и Ореше.

Мијачкиот вез е доста сложен, богат со шари, кои го прават посебен и карактеристичен.

Вистински предизвик ми беше и Ангелот од Курбиново да го претставам во нов, современ контекст.

Какви ти се плановите за во иднина? Дали би сакал да користиш и некои традиционални техники за изработка на твоите продукти, пример со разбој за ткаење?

Во иднина ќе работам на нови дизајни и нови производи. Ќе работам на желбата Акреа да добие сопствено продажно место.

Ќе воведам и традиционални техники во изработката на производите и дизајните како везење, плетење и ткаење.

Повеќе фотографии на следната страница...