Марија од Скопје свири труба: „Сум доживеала многу предрасуди, мислеа дека ќе се откажам“

Детали

понеделник, 17 февруари 2025

„Се надевам дека во Македонија ќе бидам инспирација за повеќе девојки да свират на овој инструмент. Конечно, после толку години гледам дека пројавија интерес неколку девојчиња и многу ми е мило“, вели Марија Најдоска (24) која е дипломиран трубач.

Марија Најдовска од Скопје има 24 години и свири труба.

Завршила средно музичко образование во ДМБУЦ „Илија Николовски Луј“ Скопје, а потоа дипломирала на Факултетот за музичка уметност, исто така во Скопје.

Факт е дека многумина на трубата гледаат како „машки“ инструмент, но Марија го дава најдоброто од себе да ги сруши овие предрасуди.

Во разговор со CRNOBELO.com, Марија открива нешто повеќе за нејзината голема љубов – трубата – но и нејзините желби и соништа како една од ретките девојки кои го избрале овој инструмент.

Целото интервју во продолжение:

Колку долго свириш труба и од каде желбата за овој инструмент? Знаеш ли да свириш и на некој друг инструмент?

15 години свирам труба. Беше љубов на прв поглед и звук.

Ни презентираа инструменти во нижото музичко училиште и кога го слушнав звукот и го видов инструментот, одма ми заигра срцето и знаев дека тоа ќе биде мојот пат.

Знам да свирам и на пијано.

Каде и со кого имаш настапувано и кој концерт ти оставил најголем впечаток?

Имам настапувано со повеќе оркестри и состави во Македонија и во други држави. Морам да издвојам два концерта кои ми оставија најголем впечаток.

Едниот е концертот со ФАМЕС во Будимпешта. Искуството беше огромно и чест беше да се претставиме пред таа публика.

Вториот концерт е со Биг бендот за Бела ноќ - македонски евергрини. Нашиот народ носи посебна топлина при срцето.

Каде и со кого би сакала да свириш?

Нашите соништа како музичари се секогаш големи, мора да сонуваш за да се трудиш да постигнеш повеќе.

Секако би сакала да настапувам со многу врвни музичари и оркестри низ светот, не би можела да издвојам некои посебно.

Си имала ли некоја непријатна случка на концерт – пример да направиш преочигледна грешка?

Имам направено грешка, секако, но среќа, се снаоѓам веднаш и знам да се извадам, така да не се случила некоја непријатна случка.

Дали свириш само класична музика или се фокусираш и на други жанрови? Што најмногу сакаш да свириш?

Моментално свирам само класична музика и сакам да се фокусирам на тоа, но откако ќе си остварам некои зацртани мои планови, сакам да свирам и други жанрови.

Освен класиката, најмногу сакам да свирам инструменталки од шпанска, италијанска, турска и, секако, македонска музика.

Дали си соработувала со некој познат музичар или имаш план за во иднина?

Планирам многу соработки во иднина, но сега сè уште не би открила додека не се оствари.

Кога ќе се земе предвид дека обично машките го избираат овој инструмент, како реагираат другите кога ќе кажеш дека свириш труба? Има ли интерес кај девојки за овој инструмент кај нас?

Многу ми се допаѓа прашањето. Јас сум прва трубачка во Македонија и на почетокот беа сите изненадени и беше доста чудно за народот како се одлучив баш за „машки“ инструмент.

Мислеа дека ми е наметнат за атракција, но секогаш беше мој избор, љубов и желба.

Сум доживеала многу предрасуди и многу луѓе мислеле дела ќе се откажам, но среќна сум што сум стигнала дотука и тек имам светол пат пред мене.

Се надевам дека во Македонија ќе бидам инспирација за повеќе девојки да свират на овој инструмент. Конечно после толку години гледам дека пројавија интерес неколку девојчиња и многу ми е мило.

Продлжува на следната страница...