Драган Стојчевски, прв Мистер на Македонија и спортски тип кој обожава мода: „На 45 години повеќе ме ангажираат како модел“

Каква е твојата тренинг рутина? Дали е секогаш иста или се менува пред да одиш на некој натпревар?

Тренинзите ми се различни, а зависат од тоа дали треба да направам маса или треба да се исчистам за некој натпревар, ако имам план да се натпреварувам.

Модата и бодибилдингот понекогаш се сметаат за различни светови. Како успеваш да ги балансираш овие две страсти (и дали едната некогаш ‘трпи’ за сметка на другата)?

Искрено, не ги сметам за различни светови бидејќи категоријата во која се натпреварувам - физик - е категорија каде што не треба да се има изразена мускулна маса.

Тука се бара атлетска конституција, а го избрав како категорија, бидејќи спортот што го тренирав има доста допирни точки со тоа што се бара.

Дали, освен за телото, водиш и грижа за кожата? Кои се твоите рутини и навики за нега на лицето и одржувањето на твојот физички изглед?

Водам грижа и за кожата секако. Пијам доволно вода - за некој ова е чудно но јас го практикувам 15-тина години наназад.

Можеби и генетиката до некаде го прави своето, но, да бидам искрен, 33 години сум физички активен, па мислам дека и тоа има доста влијание на мојот изглед.

Кој сака да знае колку вода треба да пие во текот на денот, слободно може да ми пише на мојот Инстаграм профил и ќе му кажам.

Што е со исхраната? Дали јадеш сè или имаш строг режим? Која храна никогаш не ја консумираш?

Кога се подготвувам за натпревар, прво одам да зголемам тежина колку што можам, но со поквалитетна исхрана - зголемувам внес на протеини и јаглехидрати, за кога ќе се чистам и намалувам на тежина, да остане некое кило мускул.

Тогаш јаглехидратите ги намалувам постепено, а внесот на протеин го задржувам.

Има периоди кога не се натпреварувам, па си дозволувам да се опуштам и јадам скоро сè што ми сака душата.

И да бидам искрен, од мал никогаш не сум наоѓал замерки во јадењето - тоа што имало тоа сум јадел.

Во принцип не јадам морска храна, дали немам навика или нешто друго, не знам, но не ми годи и не јадам таква храна.

Меѓу модата и бодибилдингот - кои ти се идните планови и цели што сакаш да ги оствариш во блиска иднина?

Немам некои посебни планови, искрено но, би сакал да бидам идниот македонски Џејмс Бонд.

А во бодибилдингот, би сакал до моја 50-та година, во една година да влезам во топ 3 на Европско првенство и топ 3 на Светско.

Е, тогаш би ја завршил кариерата и би се посветил на помладите генерации да им бидам личен тренер, иако тоа и сега го правам.

Но, не се рекламирам искрено. Кога ќе видам кој сè станува тренер во Македонија, ми е срам да кажам дека сум тренер и јас.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело