Чарна Невзати по изборот за Мис: „Темпото беше напорно, секогаш требаше да сме насмеани и со шминка, но уживав“

На сцената изборот е гламурозен, но како е зад неа?

Кореографиите ги спремавме цело време. Секојдневно вежбавме по неколку часа - во патики, во штикли, во костими… Сѐ беше строго координирано и точно.

Шминката и фризурата понекогаш траеја и по 2-3 часа. Јас сама се спремав!

Имаше и професионален тим кој ни беше како помош за костими и шминка-фризура.

Често мораше да бидам трпелива - да чекам ред, да доработувам сама, и секако да си помогнеме една на друга.

За вечерните излегувања се средувавме сами.

А за фотографиите, имаше официјални фотографи за важните моменти, но за секојдневните спомени ние си бевме фотографи, модели и стилисти едни на други. Телефоните и светлата ни беа секогаш при рака.

Имавме и неколку официјални средби и интервјуа со жирито.

Таму се оценуваше не само изгледот, туку и ставот, комуникацијата, начинот на размислување.

Мене, лично, ми беше драго што имав можност да зборувам за моето образование, мојата замја и мојата мотивација и страст како правничка и говорничка.

Како изгледаат девојките без шминка? Дали се навистина толку убави или некои се обични ако не се средени? Дали излегувавте некаде ненашминкани или секогаш мораше да сте спремни за фоткање и со шминка?

Искрено, девојките без шминка изгледаат сосема различно - некои изгледаат речиси исто, други се потполно трансформирани.

Но тоа не значи дека се помалку убави, туку дека шминката навистина знае да го потенцира најдоброто кај секоја од нас.

Имаше девојки кои зрачат дури и без капка шминка, токму поради нивната харизма, насмевка, или убавината на кожата.

Инаку, секогаш бевме целосно средени и нашминкани во кое било доба од денот, освен кога спиевме ха, ха.

Како го негуваше лицето, особено што во овој периодот беше постојано под шминка?

Мора да признаам, не беше лесно. Лицето ми беше под шминка и по 12-14 часа дневно, секој ден.

Затоа, рутината за нега ми беше повеќе од потреба - беше спас. Така што сега можеби ќе паузирам со шминкање.

Интересно е што во хотелот Trident каде што бевме сместени, секоја девојка доби сет од RAS skincare, индиски природни производи направени од чисти растителни екстракти и етерични масла.

А ова искуство ме научи дека негуваната кожа е најдобрата подлога и за шминка, и за самодоверба.

Постоеше ли ривалство меѓу девојките? Дали некои се однесуваа надмено, како да се поважни од другите, правеа драми, имаа посебни барања?

Секако дека имаше моменти на тензии покрај 108 девојки, умор, притисок - тоа е очекувано.

Но, генерално, атмосферата беше коректна.

Имаше неколку „диви карактери“ кои мислеа дека сцената им припаѓа само ним, но тоа брзо се балансираше, зашто на крајот, сите сме човечки суштества под шминката и круните.

Бевте на многу забави, настани, дружење - раскажи ми една анегдота од трите недели поминати таму…

Најинтересна, без дилема, беше журката по крунисувањето на Мис на светот, тоа беше вечер која никој од нас нема да ја заборави.

По недели исполнети со проби, интервјуа, напорен распоред и големи очекувања, конечно дојде моментот кога притисокот исчезна, круната беше доделена, камерите се изгаснаа и сите ние повторно станавме само девојки кои сакаат да се забавуваат.

Музиката беше гласна, сите беа во својот национален костим или свечен фустан, но за првпат никој не внимаваше дали косата е на место или дали шминката е совршена.

Танцувавме боси, се смеевме, се гушкавме девојки од буквално сите делови на светот.

Дали си разочарана што не влезе во финалните 40?

Искрено? Малку. Сите работевме многу и нормално е да се надеваме.

Но не се чувствувам поразено, напротив, горда сум што ја претставував Македонија со автентичност и достоинство.

Финалните 40 беа избор на жирито, а мојата победа беше сѐ што научив и доживеав таму.

Па, што научи најмногу за себе во овие денови?

Научив дека сум посилна отколку што мислев. Дека можам да бидам гласна кога треба, тивка кога е мудро, и доследна на себе дури и под притисок.

Ова искуство ми покажа дека автентичноста секогаш има вредност дури и ако не ти донесе титула.

Повеќе фотографии на следната страница...