Кристијан и неговиот тим ја направија најобемната македонска игра – Скопје 83: „Почнавме во 2019-та, долго работевме на градот“

Детали

вторник, 11 ноември 2025

„Скопје во нашата игра не е идентично секако, но е длабоко инспирирано од вистинскиот град и пресликува голем дел од неговите знаменитости, особено уникатни области и градби со бруталистичкиот стил – УКИМ, Студентскиот дом Гоце Делчев, поштата, комплексот банки, Хидрометеоролошкиот завод, Градски ѕид...“ - открива Кристијан Трајковски од студиото Dark-1 за видеоиграта Скопје '83.

Скопје ’83 е видеоигра создадена од македонското студио Dark-1 и е меѓу првите од ваков тип развиени во Македонија.

Дејството на играта е сместено во фиктивна верзија на Скопје која играчите можат да ја истражат додека се борат со непријатели, а можат да играат и со други играчи.

Играта е достапна на платформата Steam од 7-ми септември 2025 и можете да ја погледнете ТУКА.

Погледнете го трејлерот за играта во продолжение:

32-годишниот Кристијан Трајковски е дел од тимот кој стои зад играта.

Тој е дипломиран софтверски инженер, а од својата 18-та година развива и видеоигри.

Во интервју за CRNOBELO.com, Кристијан открива детали за изработувањето на еден ваков амбициозен проект:

Од каде идејата за играта? Зошто токму „дистописка“ верзија од Скопје во 1983 година?

Првичната идеја за играта ни беше дејствието да се случува во еден град полн со бруталистичка архитектура, токму онаа која преовладува во Скопје по земјотресот, и решивме – зошто да не е тоа баш Скопје.

Периодот го одбравме да е баш при крајот на ерата во која се гради во овој стил.

Скопје во нашата игра не е идентично секако, но е длабоко инспирирано од вистинскиот град и пресликува голем дел од неговите знаменитости, особено уникатни области и градби со бруталистичкиот стил – УКИМ, Студентскиот дом Гоце Делчев, поштата, комплексот банки, Хидрометеоролошкиот завод, Градски ѕид…

Колку време ви требаше да го „изградите“ Скопје за играта? Како се одвиваше процесот и колкав дел од градот е опфатен?

Градот се работеше многу долго време – играта започнавме да ја работиме околу 2019 година.

Првите години се работеше најинтензивно на чести модели и нивна адаптација кон стрипскиот стил на играта, па понатаму работата продолжи на моделирање на зградите и знаменитостите.

Потоа истите беа поставени на своето место во градот и беа дополнително декорирани за да се постигне бараниот изглед.

Во играта се опфатени – на исток Аеродром, на запад до Карпош, северно до Чаир, јужно до најнискиот дел на Водно.

Дали користевте вистински фотографии од Скопје од 1980-тите? Колку е реалистичен градот – се препознаваат ли улици, згради, споменици…

Вистински фотографии се користени само за реплицирање на изгледот на одредени згради кои сметавме дека се позначајни за да се добие бараниот изглед, а за самиот град имаме земено голема креативна слобода, така што најголемиот дел не изгледа како во реалноста.

Некои делови се препознатливи, како и распоредот на улиците и знаменитостите. Сепак, се работи за видеоигра која примарно треба да биде интересна за играње и „гледање“.

Голем дел од западниот дел на градот е издигнат и обраснат со зеленило, источниот дел е окупиран од секти, северниот е полн со машинерија…

Како го одбравте визуелниот стил на играта?

При почетокот на планирањето имавме желба да направиме нешто поразлично и несекојдневно.

Дел од нас сакаат стрипови, тоа е стил кој не е премногу застапен во овој тип на видеоигри, па сакавме да тргнеме во таа насока.

Потрошивме многу време во прототипирање на стилот и техниката на приказ со цел да ги добиеме линиите и сенчењето баш онака како што сакаме.

Продолжува на следната страница...