Христина од Кичево се пресели во Швајцарија со 2 деца, од кои едно со застој во развој: „Заминавме откако го заборавија сам во градинка“

Какви активности сака сега Леонид, што најмногу правите?

Леонид во овие моменти е фокусиран на училиштето и на завршување на неговите училишни обврски.

На неделно ниво има физијатар и логопед, од февруари стартува повторно со ерготерапија и неурофидбек, паралелно со тоа во училиште започнува со психомоторика.

Во слободно време ужива да игра со лего коцки и негови херои, надвор е постојано во друштво со брат му и играат фудбал на блиското игралиште, исто така редовно е присутен на моите саботни читачки анимации во библиотеката.

Се вклучува ли некогаш и постарото дете во активностите, како го прифаќа сега сето ова?

По дома постариот син знае да му се приклучи во неговата игра со лего коцки и заедно да играат и создаваат приказни. Така знаат да бидат заиграни подолго време.

Андреј секогаш му е огромна поддршка на Леонид, тој живее заедно со неговите предизвици уште од самото раѓања на Леонид. Знае да сочувствува со него и секогаш му е огромна поддршка за сè.

Надвор постојано го зема со него во друштво со неговите другари и секогаш заедно играат, со тоа и другарите од Андреј го прифатија Леонид, и на некој начин сите се негова заштита.

Бескрајно сум благодарна за сето ова, благодарна што постариот син преку Леонид научи за емпатичност, прифаќање и соучуствување на другите кои се соочуваат со одредени предизвици.

Како се одгледуваат децата таму, кои се клучните разлики од растењето на децата во Македонија?

Тука во однос на тој момент е поразлично во секој поглед кога се во прашања одгледувањата на децата. Сакам да нагласам дека сето она кое тие го практикуваат го правев и јас со моите деца во Македонија, само што тука воздухот е екстремно чист и во тој поглед не може да се споредиме.

Тука практикуваат децата да се постојано надвор без разлика на временските услови, за нив не постои лошо време, само лоша облека.

Секогаш децата се облечени во соодветна облека за дожд, снег или сонце. Тука климата е постојано влажна, и ако се водиме на моментот да чекаме сонце да огрее за децата да ги пуштиме надвор, тогаш мислам дека децата постојано би биле затворени дома.

Така функционираат и градинките и училиштата. Постојано ги носат во шума облечени целосно со гумени панталони, јакна и чизми и дома се враќаат целите во кал.

Правеле лизгалка од кал, правеле торти и ручек од кал. За нив сето тоа е нормално, со што целосно се согласувам и јас.

И морам да нагласам дека моите деца во Македонија беа постојано болни и со хроничен бронхит и постојано со антибиотска терапија, но откако дојдовме тука ние повеќе не знаеме што е бронхит и антибиотици.

Во однос на чувањето деца тука целосно се организирани. Породилното боледување тука трае само 3 месеци, и мајките многу кратко се со своите деца, па затоа бабите и дедовците секогаш се тие кои ќе ги начекаме како ги шетаат своите внучиња.

Некои родители се одлучуваат да работат од дома па така постојано се тие со своите деца.

Како и да е сè е поразлично, не можеме со ништо да се споредиме. Но ете како што напомнав и на почетокот за сè си има свои предности и слабости.

Каков е таму здравствениот систем, како функционира?

Здравствениот систем во Швајцарија е целосна различен и од кај нас и од Европа. Тука одбираш здравствена полиса со одредена франшиза и на месечно ниво го плаќаш здравственото осигурување за целото семејство без разлика дали си болен или не.

Кога се оди на прегледи плаќаш сè додека го достигнеш нивото на висината на франшизата, после тоа покрива државата. А за децата до 18 години плаќаме само 10% од висината на сумата за која се наплатил прегледот.

Во однос на Македонија и другите европски земји тука здравството се плаќа, но има и доста привилегии, во зависност од сумата на финансиските примања во едно семејство висината се прилагодува, и ако пример еден член од семејството не работи, а другиот зема помали примања, тогаш се поднесува барање за намалување и врз основа на тоа тие вршат пресметка и ја намалуваат висината на здравственото осигурување.

Што се однесува до здравствената услуга, и тоа нема споредба, чистота, систем и сè останато се на високо ниво. Швајцарија е држава каде системот им е беспрекорен, сè е подредено на високо ниво, и едноставно така сите функционираат.

Добро ли сте прифатени од локалците, стекнавте ли пријателства? Какви се луѓето таму?

Па да. Тука каде што живееме ние во нашата зграда само ние сме Македонци, има Швајцарци, Португалци, Шпанци, Турци, Еритрејци, Словенци и ние, и со сите одлично функционираме.

Во ова наше маало има доста и Македонци, со кои имаме коректен однос. По природа јас и мојот сопруг не сме личности кои правиме собиранки по дома за време на викендите, а тоа тука нашите често го практикуваат.

Ние практикуваме за викенд да бидеме излезени и да прошетаме на некое место каде што не сме биле, шетаме во шума, и на места каде има што да посетиме, а тука има премногу природни убавини кои вреди да се посетат.

А што се однесува до народот и Швајцарците, тие се многу поразлични од нас. Насмеани, секогаш поздравуваат без разлика дали те познаваат или не, премногу се благодарни ако во случај нешто им помогнеш, тие веднаш сакаат да се заблагодарат со некој мал гест, или пак ако ги испочитуваш и само со едно чоколадо тие се среќни и благодарни, знаат да живеат, и често негуваат здрав живот и спорт и на стари години.

Нивните утра секогаш почнуваат рано, и денот исто рано им завршува.

Совет до сите родители во слична ситуација...

Прво нешто што секој родител треба да го направи за своето дете во моментите кога ќе дознае дека се соочува со одредена проблематика е да ја прифати состојбата.

Со самото прифаќање и соочување му помагаме на своето дете во моментите кога ние сме му најпотребни.

Откако целосно ќе прифатиме тогаш веднаш треба да почнеме да истражуваме за целата дијагноза. Со едукација ние целосно знаеме како можеме да му помогнеме, влегуваме целосно во неговиот свет и заедно со стручњаците паралелно работиме и ние за да го забрзаме процесот и да можеме да добиеме вистински напредни резултати.

Јас од самиот старт велев дека стручњаците немаат магично стапче, и не можеме целосно да се потпреме врз нивната работа, затоа што ако стручњакот дава сè од себе за да му помогне на нашето дете во рок од еден час, а ние остатокот од денот го поминеме со своето дете на технологија, тогаш голема е веројатноста да немаме резултати и залуден да биде трудот кој го вложиле стручњаците, и вашите финансии, а изгубеното драгоцено време може премногу да го чини вашето дете.

Затоа мој најискрен совет е уште од самиот старт кога ќе увидите промена во развојот на своето дете веднаш да го однесете на проценка и веднаш да започнете со работа, затоа што изгубеното време во рано развојната интервенција влијае врз целокупниот понатамошен развој на своето дете.

А доколку се одлучите за преселба во странство, тогаш не стравувајте, нормален е целиот процес на адаптација, учење јазик, навикнување на средина, но доколку сте упорни резултатите секако ќе си дојдат, само доследно и дисциплинирано продолжете да чекорите кон вашата патека.

Верувајте во своето дете и никогаш не се откажувајте. Знајте дека до вас имате вистинско богатство кое секојдневно ќе ве учи дека животот е убав, ќе растете заедно со вашето дете, ќе бидете присутни во моментот и ќе му се радувате на животот, на секој негов успех ќе славите како една голема ваша заедничка победа.

И ова ваше патувајте гледајте го како едно големо растење и дека ако не било вашето дете вие никогаш и немало да го знаете кој е предизвикот со кој се соочуваат овие деца.

Гледајте на него како еден благослов од Бог, кој ви бил дар токму на вас, и преку него ќе научите и дознаете која храброст, борбеност, сила и истрајност сте ја имале во вас, а никогаш и не сте знаеле ниту сте замислувале дека би можеле да го изведете сето ова низ кое сте поминале...

Прочитајте го и интервјуто од 2022 година, пред преселбата: Христина од Кичево е мајка на предвреме родено дете: „Имав нормална бременост, дури по 2 години сфативме дека син ми има застој во развојот“

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело