Ивана (28) од Прилеп прави косплеј костими: „Се изработуваат и за една недела, но за најтешкиот ми требаа 6 месеци“

Најсложен дел беше изработката на Deathtrap – робот поголем од мене, кој го направив да се движи со помош на тркала и механизам управуван со далечински управувач.

Мој омилен косплеј е Rayne од BloodRayne, бидејќи има посебна носталгична и сентиментална вредност за мене.

Дали ги чуваш сите костими што си ги направила?

Да, повеќето костими ги чувам бидејќи зад секој од нив стојат многу часови работа и убави спомени.

Колку е прифатен овој тип на уметност кај нас? Дали луѓето генерално го сфаќаат сериозно или уште го гледаат како најобично маскирање? Од друга страна, дали има многу косплеери и дали нивниот број се зголемува?

Косплејот сè уште не е целосно прифатен како форма на уметност кај нас. Многу луѓе, сè уште го доживуваат како обично маскирање.

Сепак, ситуацијата постепено се подобрува. Сè повеќе настани се организираат во Македонија, а интересот кај младите расте, што придонесува за развој на локалната косплеј заедница.

Неодамна победи на UBCC. Кажи ми нешто повеќе за натпреварот и за костимот што го носеше.

На UBCC (Ultimate Balkan Cosplay Championship), организиран од Urusai Con, учествуваа претставници од седум балкански држави: Македонија, Србија, Бугарија, Босна и Херцеговина, Црна Гора, Хрватска и Словенија.

Секој натпреварувач беше избран преку национален косплеј натпревар во својата држава.

Ова беше прво издание на натпреварот и ми претставува огромна чест што ја освоив титулата Ultimate Balkan Cosplay Champion.

Костимот со кој настапив го изработував околу два месеци, а во процесот вложив многу труд, внимание на детали и љубов кон самиот карактер.

Дали си учествувала и на други натпревари или планираш во иднина?

Да, претходно сум учествувала на повеќе косплеј натпревари, меѓу кои и оние организирани во рамки на A1 Game Fest од страна на A1 и GGTV.

Во иднина дефинитивно планирам да продолжам да се натпреварувам, да создавам нови костими и да ја претставувам Македонија на што повеќе регионални и меѓународни настани.

Што би сакала да се промени во врска со косплеј културата во Македонија? Што недостасува кај нас?

Би сакала косплејот во Македонија да добие поголема поддршка и признание како форма на уметност и креативно изразување.

Иако во последните години има позитивни промени и сè повеќе настани, сè уште недостасуваат специјализирани продавници за материјали, работилници и поголеми настани каде косплеерите можат да ги покажат своите вештини и да разменуваат искуства.

Исто така, би сакала да има повеќе можности за едукација и соработка меѓу косплеерите, како и поголема поддршка од компании и институции кои ја препознаваат вредноста на ова хоби.

Македонија има многу талентирани косплеери, а со подобри услови и повеќе можности, сигурна сум дека нашата сцена може уште повеќе да се развива и да биде препознаена и надвор од границите на државата.

©CRNOBELO.com Забрането преземање и копирање. Крадењето на авторски текстови е казниво со закон.

Софија Спирова | Црнобело