Филип Боцевски, персонален тренер: „Македонците прават 4 иритантни работи во теретана, а најголем непријател на фит изгледот е слабиот карактер“

Позната личност со најфит тело според тебе е…

Повеќето познати личности се фит иако нивните улоги не секогаш го наложуваат тоа. Тие едноставно живеат здрав начин на живот затоа што ги знаат бенефитите од тоа.

Според мене најфит познати личности се Двејн Џонсон, Марк Волберг, Силвестер Сталоне, Хју Џекмен, Џејсон Момоа и Крис Хемсворт.

Колку е тешко да се пристапи на вистинскиот начин од психолошки аспект кон секој клиент?

Доколку клиентот има јасно зацртана цел и е карактерно стабилен, пристапот е лесен. Но, има случаи кога клиентот е психички и карактерно полабилен.

Вашата работа е да знаете да го водите низ тој процес на остварувањето на истата и притоа психолошки и ментално да го поддржите и да влијаете, да го предвидите неговото однесување и на таа основа да знаете како и кога и на каков начин да го мотивирате.

Си имал ли некоја повреда направена при вежбање досега?

Сите мои повреди кое ме спречувале да вежбам настанале надвор од местата кои сум вежбал на така што не.

Колку килограми креваш на бенч? Дали мажите претеруваат со овој тип на докажување и резултатот е несакани повреди?

Кај нас главно бенч пресот се смета за една од најважните вежби за докажување на сила, иако има многу подобри алтернативи за тоа.

Главниот непријател е машкото его, односно потребата да се докаже кој поместил најмногу товар, иако е тотално ирелевантно. Колку е поголема килажата, толку е и поголем ризикот од повреда, па доколку не се придржуваме на неколку клучни работи пред да се обидеме да креваме килажа кои ни самите не сме можеле да ги кренеме претходно и не се придржуваме на советите, исходот може да биде и трајна повреда.

Најбрз начин за симнување килограми е…

Најбрз начин за да намалиме на телесна килажа е да бидеме во калориски дефицит, односно да имаме помал внес на калории и поголема потрошувачка на истите, меѓутоа има разлика помеѓу само симнување на килограми и намалување на маснотии во телото.

Најефикасен начин за зголемување на телесна, односно мускулна маса е да го зголемиме внесот на калории, да го зголемиме внесот на протеини, а воедно и на макронутриентите. Потоа да го зголемиме волуменот односно интензитетот на вежбањето, бројот на повторувањата и секако да не го изоставиме закрепнувањето во однос на сонот, бидејќи тоа е исто така важен фактор за зголемувањето на нашата мускулна маса.

Омилениот совет кој им го даваш на клиентите е…

Напрво да бидат трпеливи на почетокот и да бидат реалистични со очекувањата доколку претходно немаат вежбано. Исто така им напоменувам дека многу информации поврзани со фитнесот кои се наоѓаат на социјалните мрежи се многу невистинити и погрешни.

Мој најголем совет е да не се споредуваат со фитнес моделите на социјалните мрежи, бидејќи оставаат една поинаква и нереална перцепција за тоа како треба да изгледаат. Едно е да ни бидат извор на инспирација, а сосема друго е да сакаме да изгледаме како нив, а само што сме започнале со вежбање.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело