Инспиративна жена: Дина Муцунска - менаџер, активист, вљубеничка во спортот и посветена мајка

Тајната да се биде добар менаџер е…

Она кое мене ми помага е знаењето, умеењето, силната емотивна интелигенција и комуникациски вештини, организациските способности и филозофијата на доживотно учење.

Кои се твоите навики за убавина? Убавината отежнува или олеснува во бизнисот?

Убавината за мене е во хигиената и среденоста на кожата, ноктите и косата, во здравите навики за сон, храна, спорт, во духовната и менталната деконтаминација, исполнетоста со љубов и знаење, во чувството за естетика, односно спастреноста, зависно од приликата – соодветната гардероба, а особен удел во убавината за мене имаат и достоинството, позитивната енергија, смислата за хумор, насмевката и харизмата, односно што поприроден изглед, држење и однесување.

Она што за мене значи убавина секако ги олеснува меѓучовечките односи и создава многу полесна комуникација и разбирање, кое е секако во прилог и на работни успеси.

Кои се твоите тајни за продуктивен ден?

Планирајте што ќе работите и работете го она кое сте го испланирале. „Губачи на време“ денес има огромен број постојано насекаде во најразни форми, од човечки до дигитални… И затоа морам најпрво да си ги поставам приоритетите, па согласно нив да го планирам своето време, со рамка на саатница и конкретни активности секојдневно и тоа за што можно подолг период однапред, кое ме води кон максимална организираност, односно ефикасност, ефективност и продуктивност.

Инаку верувам дека добриот избор на храна и многу вода, кои ги внесувам согласно моите потреби, но исто така и дозираноста со спорт, кој предизвикува циркулација – поголем доток на крв односно кислород во мозокот и ослободување од стрес, се во огромна мера одговорни за концентрацијата, енергијата и издржливоста, која ја поседувам.

На кои животни успеси си најгорда?

Согласно погоре одговореното, се отсликува секако дека е тоа одењето по патот на мојата мисија. А како конкретни нешта поврзани со секојдневните обврски би го издвоила мојот директен придонес за развојт на туризмот во Берово и Малешевијата и тоа од самите негови пионерски зачетоци во новата македонска историја, а до денес веќе пасионирана две децениска посветеност.

Односно креирањето на туристичките производи и услуги, од секој можен аспект: сместувачки капацитет, ресторански услуги, содржини за забава и рекреација, тури и екскурзии за посетителите и гостите, но и секако обука и обликување на човечките ресурси како кадар кои ќе ги сервисира овие содржини.

Исто така исклучително значајно е моето делување во поврзувањето и креирањето – „пакувањето“ на ресурсите од регионот како туристички производи.

Од гледна точка на природата – маркиравме многу планински патеки за планинарење, пешачење и планински велосипедизам, го ставивме и езерото во функција со обезбедување на кајак и СУП даски понуда за групи, преку проект набавивме 25 премиум планински велосипеди за туристичко изнајмување, во туристички тури ги вклучивме: спомениците на културата, манастирите со нивните манифактури, музејот, исто така многу важен дел во туристичката понуда дадовме на традицијата, особено на традиционалната кујна со сите специјалитети кои ги „воскреснавме“, а пак ги подготвуваме од еко намирници произведени во чистиот малешевски регион, дел од традицијата се и занаетчиските работилници кои ги направивме достапни за нашите групни посети каде може да се проследи начинот на создавање на утилитарните добра, без кои животот во минатото не бил замислив, како на пример: ткајачката, воденичарот, калајџијата, бочварот, ковачот, копаничарот…

На кратко кажано со моето секојдневно работење имам огромен удел во создавањето на регионот Берово и Малешевијата како препознатлива „туристичка дестинација“ во нашата земја и особено со моите ангажмани во неговата промоција, успеваме да привлечеме навистина голема и перманентна негова посетеност 12 месеци во годината, а бидејќи во функционирањето на синџирот на туризмот се вклучени премногу други комплментарни бизниси и даватели на услуги, тоа значи дека индиректно ја помагам многу локалната економија, кое води кон подобар квалитет на животот на локалното население и намалување или за жал успорување на иселувањето од крајот …

На сето горенаведено успевам да делувам и како човек од бизнис секторот – генерален менаџер на Хотел Манастир, но и како граѓански активист – претседател на здружението на граѓани ПСК Малешевска Корија.

Продолжува на следната страна...