Горан Митров, струмичанец со префинет моден стил: „Пасија ми се чевлите, а оделата ми се заштитен знак“

Детали

четврток, 17 ноември 2022

„Најдобро се чувствувам во црно одело и бела кошула, но сакам и авнгарда. Би сакал да можам да се сместам во еден стил ама малку е тешко. Едно е сигурно, не сум минималист. Ги сакам деталите“, споделува Горан Митров (37) од Струмица за CRNOBELO.com за својот впечатлив моден стил.

Горан Митров (37) од Струмица, генерален директор на хидротермален медицински центар Цар Самуил во Струмица и бренд менаџер во Елена Лука, е маж со навистина впечатлив и префинет стил, на кој слабост му се оделата.

Внимава на деталите, вљубеник е во класиката, но кога пригодата го дозволува тоа обожава и авангардни стајлинзи, oд кои прикачува фотки на својот Инстаграм профил.

Горан за CRNOBELO.com ги споделува тајните на неговиот моден стил:

Како би го опишал твојот моден стил? 

Би сакал да можам да се сместам во еден стил, ама малку е тешко. Едно е сигурно, не сум минималист. Ги сакам деталите.

Да речеме дека се движам некаде помеѓу класика за на работа и авангарда на места што тоа го заслужуваат. 

Колку стајлинзите се твој начин за да оставиш впечаток?

Никогаш не сум се трудел да оставам впечаток. Од друга страна сум свесен за својата појава и енергијата што ја носам со себе. 

Сакаш ли кога си забележан и кога луѓето се вртат по тебе?

Па, не дека нешто посебно тоа ми го крева егото, дефинитивно не. Ама ми ја милува самодовербата, исто како наивен флерт.

Всушност многу е битно кој тоа тука се „врти“. Јас во принцип никогаш не сум знаел како соодветно да реагирам на пофалби и комплименти . 

Кои ти се омилените модни парчиња?

Дефинитивно чевли. Таа пасија не се споредува со ниедна друга.

Кои ти се најекстравагантните обувки кои ги поседуваш?

Tешко ми е да издвојам навистина. Имам еден пар чевли што се посебно интересни, особено поради начинот на кој настанаа.

Ме удри автомобил и чевлите беа да не речам уништени. Барав начин да ги оживеам и тимот на Елена Лука врз нив изработи еден перфектно добар рачно направен цртеж со многу детали.

Имам и од други брендови неколку навистина уникатни парчиња, изработени специјално за мене.

Трошиш ли многу пари на гардероба? Кое ти е најскапото парче што го поседуваш? 

Чашата е или половина полна или половна празна, сè е тоа индивидуално. „Многу“ за секој има различна вредност. 

Јас често знам да кажам дека животот е краток и дека човек треба да прави сè што му прави ќеиф и може да си го дозволи.

Имаш ли огромен гардеробер? Успеваш ли да ја сместиш целата облека? 

Многу сум педантен во однос на гардеробата и секое парче си има свое соодветно место. 

Позната личност, наша или светска, со најдобар моден стил...

Том Форд. И тоа што го прави и тоа што го носи мене лично ми се допаѓа. Кај нас такво нешто не постои. 

Колку стилот на облекување е дел од твојот идентитет?

Во голема мера е. За мене аутфитот секогаш бил тесно поврзан со тоа како се чувствувам во моментот.

И никогаш не било исфорсирано дека мора да се движам во некој правец. Едноставно тој сум јас.

Најдобро се чувствувам во црно одело и бела кошула. 

Колку Македонците се доброоблечен народ според тебе? 

Ќе поентирам со една поговорка, која вика вака: „Ако си најпаметниот човек во собата, веројатно си во погрешна соба”. Исто е и со модата. Заклучете сами.

На следната страна повеќе фотографии од стајлинзите на Горан...