Марија Димишкова (33), експерт за јавно говорење: „Луѓето повеќе се плашат од јавен настап отколку од пајаци, тремата значи неподготвеност“

Кои се најчестите грешки што ги прават луѓето додека се подготвуваат и кога држат јавен говор?

Примарната грешка што ја прават е недоволната подготовка за јавниот настап. Многу често го потценуваат јавниот настап и се појавуваат некомплетно подготвени, па оттука следуваат и дополнителни пропусти во јавниот говор.

Во однос на таа недоволна подготовка, може да се случи да употребат погрешна терминологија или фрази што не ги разбираат, да имаат неадаптиран говор на тело, да немаат добри поенти во содржината што ја споделуваат, да не се запознаени со говорничкиот кодекс на однесување, да не внимаваат на кодексот на облекување и уште многу други моменти кои ги издаваат дека се несигурни и неподготвени.

Можеме ли да ја избегнеме тремата со добра подготовка? Како и колку време треба да се подготвиме за да ја избегнеме?

90% од тремата што ја чувствуваме пред јавен настап е резултат на недоволна подготовка. Оттука, тремата и недоволната подготовка се многу тесно поврзани.

Една квалитетна подготовка се состои од интересна и добро подготвена содржина, адаптирана вербална и невербална комуникација.

Кога ја подготвувате содржината, истражете ја добро темата што ќе ја зборувате, соберете што е можно повеќе непознати факти и статистика поврзани со неа, разговарајте ја темата со вашите пријатели и соберете повеќе мислења за неа.

Осмелете се додека ја подготвувате содржината да излезете од комфор зоната на интернет просторот, читајте стручна литература, биографии на влијателни личности, студии поврзани со конкретната тема.

Откако ќе ја напишете содржината, зборувајте ја на глас, станете свесни за динамиката на зборување, за интонацијата и темпото на презентирање. Потоа, зборувајте пред огледало и вежбајте го говорот на вашето тело.

Постои ли некоја брза техника за смирување, во случај да имаме многу трема пред почетокот на јавниот говор?

Секоја желба за да се опуштите, да го истакнете вашиот глас, да ја намалите напнатоста, сè започнува од дишењето.

Кога сме под стрес пред почетокот на јавниот настап, се вознемирува телото, се подигнува нивото на адреналин, срцето побрзо чука, дишењето ни е кратко и брзо.

Земете си време за себе пред почетокот на говорот, фокусирајте се на бавно длабоко вдишување и издишување.

На тој начин ќе го смирите дишењето, ќе го опуштите телото и ќе направите дефокус на негативните мисли што многу често ни поминуваат низ глава кога сме вознемирени.

Зошто некогаш ни се „блокира“ мозокот, особено кога одговараме или полагаме усно, и може ли да се избегне ова?

Недоволната подготовка на материјалот за зборување и вознемиреноста што ја чувствуваме пред некој настап, испит или деловен состанок може да доведат до помала концентрација понекогаш проследена со одредена блокада во комуницирањето.

Колку што посветувате внимание на добра подготовка на материјалот за тоа полагање или усно одговарање, толку посветете време и на себе. 

Погрижете се да имате добар сон непосредно пред полагањето, да се храните и хидрирате доволно, да ја намалите вознемиреноста со помош на серија длабоки дишења.

Ставете го повеќе фокусот на она што треба да го кажете, а помалку на тоа како се чувствувате во моментот.

Продолжува на следната страница...