Сузана Божинкочева: „По 4 години борба со неплодност и тон ужасни совети, со 3-тото ин-витро добив син“

Детали

недела, 04 јануари 2026

„Уф, не можам ни да ви дадам точна бројка колку инјекции, клексани, апчиња, вагиналети имам ставено во моето тело. Илјадници. Во еден период имав толку многу хормони во себе што физиономијата и карактерот ми се сменија тотално“, искрено раскажува Сузана Божинкочева (39), мајка на 18-месечниот Марко.

Сузана Божинкочева (39) од Скопје, новинар по професија, по 4 години борба со неплодност, го добила синот Марко, кој денес има 18 месеци.

Во тој миг ѝ се исполнил сонот да се реализира како мајка.

Вели дека со сопругот започнале со обиди да станат родители уште пред свадбата во 2019-та година.

Го споделува јавно изодениот и навистина тежок пат, за сите кои минуваат низ истото.

Сузана ја споделува својата приказна за CRNOBELO.com:

Колку време со сопругот се обидувавте да имате деца, пред да помислите дека постои некаков проблем и е време за испитувања?

Со сопругот се обидувавме да имаме дете уште пред нашата свадба (септември 2019-та година).

Првата помисла дека нешто не е во ред ја имавме околу 6 месеци по првичното активно обидување.

За жал, во тој период дојде и КОВИД-19 пандемијата, па сè одеше многу поспоро од очекуваното во однос на медицинските испитувања.

Какви испитувања направивте и кој беше заклучокот на докторите?

Започнавме со стандардната процедура, што е кај секој кој ќе тргне по овој пат.

Ехо, хормонален статус, спермограм, за подоцна да се прошири листата на испитувања со ХСГ и хистероскопија во 2022-ра година за да отстранам септум на матката кој додатно ги комплицираше работите.

Инаку, септум на матка е вродена анатомска состојба при која внатрешноста на матката е делумно или целосно поделена со тенка преграда (ѕид), наречена септум.

Откако ти ја поставија дијагнозата, што беше нареден чекор?

Покрај септумот, официјалната дијагноза беше намалена оваријална резерва и веднаш од страна на матичната бевме советувани да побараме помош од специјалисти на асистирана репродукција.

На препорака од матичниот гинеколог се одлучивме за една приватна клиника и за доктор Владимир Трајковски кој ме водеше низ сите преостанати процедури, стимулации и трансфери.

По колку години неуспешни обиди дојде до асистирано оплодување?

Дојде по 2 неуспешни обиди. Третиот обид се покажа успешен за нас, и вечно ќе го паметам тој датум.

17-ти ноември 2023-та година беше денот на трансферот со кој го добивме син ми.

Тоа беше екстремно врнежлив ноемвриски ден, но сестра ми како да предвиди дека ќе биде среќен за нас. И така и беше.

Долови ни како изгледа оваа постапка? Колку е емотивен процесот?

Пред започнување на самиот процес на стимулација потребно е собирање на документи и резултати од тестови, анализи и инсеминации (кај нас фондот бараше 3 претходни инсеминации пред да ни одобрат ваучер за ин-витро).

Тоа само по себе е посебна приказна бидејќи голем дел од документите се чекаат долго, голем дел од реагенсите недостасуваа, па мораше да се снаоѓаме на приватно и времето поминато во чекање, прашување, земање упати и резултати е дополнителен товар.

Може да трае и до една цела година. Тоа е екстремно емоционален, финансиски и психолошки товар за толку долг период.

За среќа, имав голема помош од мајка ми, сестра ми, сопругот, но главниот товар го носи самата жена што поминува низ тоа. За жал, така е...

Продолжува на следната страница...