3-месечно бебе кое беше спасено од урнатините во Турција конечно во прегратка на мајка му (видео)

Детали

понеделник, 03 април 2023

Јасемин Бегдас во земјотресот во Турција ги загубила сопругот и двата сина, а по 54 дена конечно имаше можност да го држи во раце своето бебе, кое било извлечено од под урнатините 5 дена по катастрофалниот земјотрес. Како изгледаше емотивната средба на мајката и бебето?

Ова 3-месечно бебе беше прогласено за „чудо“, откако спасувачите успеаја да го спасат од под урнатините 5 дена по страшниот земјотрес што ја погоди Турција во февруари годинава.

Сега, по речиси 2 месеца, малото девојче конечно беше дадено во прегратките на неговата мајка.

Речиси сите турски медиуми во февруари ја пренесоа веста за наоѓањето на 3-месечното бебенце што беше извадено од под урнатинините во Хатај, Турција, 5 дена по страшниот земјотрес што ја погоди земјата.

Медицинските сестри и спасувачите на девојчето му го дадоа името Гизем.

Бебето немаше поголеми здравствени проблеми, по што веднаш беше пренесено во Анкара каде беше предадено на надлежните институции да се грижат за него.

Но сега, 54 дена по катастрофалниот земјотрес, малото бебе конечно се најде во прегратките на својата мајка.

Имено, откако бебето било земено од надлежните институции, со ДНК анализа било утврдено дека името на девојчето е Ветин Бегдас и дека е ќерка на Јасемин Бегдас.

Во катастрофалниот земјотрес, Јасемин ги изгубила сопругот и двата сина.

Во емотивното видео од повторната средба на мајката и бебето, може да се види како Јасемин со солзи во очите го прегрна своето бебе, додека сѐ уште е во болнички кревет и се опоравува од повредите со кои се здобила за време на катастрофата.

Погледнете го видеото во продолжение:

Б. С. Б. | Црнобело