Салата 14 евра, пиво 7 евра – Наш фотограф споделува какви се цените во Дубровник

Детали

понеделник, 17 јуни 2024

Нашиот фотограф Драган Тапшанов со семејството беше на некои од најпознатите места во Хрватска со камп возило. Додека вели дека цените во камповите се сосема нормални, во рестораните и локалите низ Дубровник приказната е сосема поинаква. Погледнете колку чинат оброците во рестораните и локалите, па проценете сами...

Во изминатите неколку години, Дубровник во Хрватска е омилена туристичка дестинација како за туристите од регионот, така и за голем број светски ѕвезди како Бекамови.

Но, колку новостекнатата популарност влијае врз промената на цените? Дали цените во Дубровник се високи, или сосема нормални ако се земе предвид дека станува збор за светски позната туристичка дестинација?

Нашиот фотограф Драган Тапшанов со неговата сопруга Едит и со синот, во изминатиот период беа на патување со камп возило низ Унгарија, па и низ Хрватска.

Тие посетија поголем број од познатите хрватски туристички места, како Задар, Шибеник, Примоштен, Трогир, а Драган покажа дека летувањето со камп возило е поевтина варијанта и е погодно за оние луѓе што имаат ограничен буџет за одмор.

Тој нагласува дека цените во камповите се нормални, а чистотата и услугите се врвни.

„Во Хрватска е строго забрането диво кампување. Значи, казните почнуваат некаде од 300 до 1.300 евра.

Затоа ќе си дојдете во кампови. Камповите се со нормални цени, иако пишуваат дека се по 50-60 евра, може да се најде и за 25-30 евра“ – појаснува тој.

Во најновото видео од Хрватска, тој покажа како се движат цените во локалите и рестораните низ Дубровник, што според некои негови следбеници се премногу високи.

Магнет – 2,19 евра, кроасан – 1,70 евра, парче пица – 4 евра, хамбургер – 10,70 евра, порција рижото – 17 евра, бурито – 24 евра, грчка салата – 14 евра, пиво – 7 евра, капри пица – 16 евра...

Ова се само некои од цените што тој успеа да ги сними.

Погледнете ги подетално цените во неговото видео:

Б. С. Б. | Црнобело