Морето во Хрватска преплавено со медузи – Што не смеете да направите ако ве опечат?

Детали

петок, 26 јули 2024

Посетителите на хрватските плажи се жалат дека секојдневно се слушаат деца како плачат затоа што биле опечени од медузи. Лекарите, пак, предупредуваат ако одите на плажа, со вас задолжително да понесете оцет... Кои медузи се појавија во Хрватска и што не смеете да направите?

Високите температури и топлотните бранови придонесоа водата во Јадранското Море да стане потопла, а заради тоа голем број од плажите да бидат преплавени со медузи.

Како што пишува Denvnik.hr, голем број медузи се забележани во заливите, каде што водата е поплитка и потопла.

„Мајка ми си подаваше топка со сестра ми и одеднаш слушнав како сестра ми вика: ‘пече, ме пече’...

Потоа веднаш излегоа надвор“ – раскажува Леана Хорват за телевизијата.

фото: HRT - принтскрин

Други очевидци, пак, раскажуваат дека веќе е вообичаено децата на плажа да почнат да плачат и да се жалат дека биле опечени од медузи.

Во овој случај станува збор за мали хидромедузи, наречени „морски месечини“, кои не се опасни, а според советите на лекарите, ако тие ве опечат, потребно е изгореницата добро да се измие со морска вода и да се олади со облоги.

„Може да се става јаболков оцет ако не се отворила рана, или веднаш да се посети лекар за да препише крем, комбинација од кортикостериоди и антибиотици, чисто за да се санира побрзо повредата“ – вели д-р Иван Стегиќ.

Морските месечини се мошне мали со полукружни капи, кои нараснуваат до 20cm, а препознатливи се по виолетовите точки на телото.

Овие медузи најмногу се забележани во околината на Хвар, а во хрватските медиуми е објавено детално упатство како треба да се третира изгореницата.

Најчесто при контактот со медузата на кожата доаѓа до алергиска реакција на отровот што тие го имаат во нивните пипала, но таа изгореница најчесто не е опасна.

Ако ве опече медуза во море, важно е да не паничите, туку веднаш да излезете на брегот, а раната да ја измиете само со морска вода, за да ги отстраните остатоците од пипалата.

Немојте да користите обична слатка вода, затоа што на тој начин пипалата ќе навлезат подлабоко во кожата.

За да се намали печењето и да се деактивираат жарните чаури што останале на кожата, потребно е изгореницата да се полие со оцет или да се ставаат облоги од оцет. Ако немате оцет, може да се користи и сок од лимон.

Ако изгореницата е поголема од големината на дланката со раширени прсти, неопходно е веднаш да се јавите на лекар, за да ви препише лекови.

Освен овие мали медузи, во Јадранското Mоре се појавија и големите „компас медузи“ кои важат за едни од поопасните.

Во околината на Црес, во плитките води биле најдени 10-тина вакви медиузи кои може да предизвикаaт болни изгореници.

Оваа медуза обично живее на длабочини до 10 метри, самата глава може да им биде со големина од 30cm, а пипалата кои всушност се опасни, може да бидат долги до 1 метар.

Компас медузата на себе има 24 пипала и заради тоа и го добила своето име.

Б. С. Б. | Црнобело